नेपाल-भारत सीमा क्षेत्रमा राति भेटिएका तीन जनालाई मुद्दा चलाउने तयारी
<p>कैलाली । लकडाउन उल्लंघन गर्दै नेपाल-भारत सीमामा पुगेका तीन जनाविरुद्ध कैलाली प्रहरी मुद्दा चलाएको छ।</p>
<p>हिजो बिहान करिब ३ बजे उनीहरू भजनी नगरपालिका ५ कौवाखेडा स्थित डाक्टरघाटबाट पक्राउ परेका थिए । पक्राउ पर्नेमा घोडाघोडी नगरपालिका १ सुखडका हिक्मतबहादुर शाही, रविन शाही र बर्दगोरिया गाउँपालिका ४ मुडाबजारका लालबहादुर बिक छन्। </p>
<p>प्रारम्भिक अनुसन्धानबाट शाहीद्वयले सुखडमा साँडेपानी पोलिक्लिनिक र बिकले मुडाबजारमा भुपु सैनिक क्लिनिक सञ्‍चालन गर्दै आएको खुलेको छ । बिक सेनाका पूर्वहवल्दार हुन् ।</p>
<p>रातिको समयमा सीमामा भेटिएका उनीहरू भारतबाट आउने औषधि लिन गएको खुलेको कैलाली प्रहरीका डीएसपी दक्षकुमार बस्‍नेतले जानकारी दिए ।</p>
<p>उनका अनुसार उनीहरूविरुद्ध सार्वजनिक स्वास्थ्य हितविरुद्धको कसुरमा अदालतबाट म्याद थप गरेर अनुसन्धान अगाडि बढाइएको छ। </p>
<p>सशस्त्र प्रहरीको भजनीस्थित बोर्डर आउट पोस्टले उनीहरूको साथबाट ४० हजार भारतीय रुपैयाँ, दुईवटा मोटरसाइकल र तीनथान मोबाइल पनि बरामद गरेको थियो । </p>
प्रतिक्रिया दिनुहोस्
.jpg)
