भारतबाट लुकिछिपी आएका थिए बाँकेको नरैनापुरका आठैजना संक्रमित
<p>काठमाडौं। बाँकेको नरैनापुर गाउँपालिकामा संक्रमण पुष्टि भएका आठैजना भारतको महाराष्ट्रबाट आएको खुलेको छ। </p>
<p>नरैनापुर गाउँपालिकाका अध्यक्ष इश्तियाक अहमद शाहले उनीहरू मुम्बई, सुरतलगायत ठाउँबाट लकडाउनकै समयमा प्रवेश गरेको बताएका छन्।</p>
<p>“उनीहरू कहिले आएका हुन् भन्‍ने यकिन जानकारी भइसकेको छैन,” उनले भने, “संक्रमण देखिएकाको विवरण आइपुगेपछि यकिन जानकारी हुन्छ।”</p>
<p>उनका अनुसार लकडाउनकै समयमा विभिन्‍न खुला सीमा नाका प्रयोग गरेर लुकेर प्रवेश गरेको देखिन्छ। नरैनापुर गाउँपालिकामा बनाइएका क्‍वारेन्टाइनमा सबै भारतबाट आएका मानिस राखिएको छ। त्यहाँ भारतको मुम्बई, सुरतलगायत शहरबाट आएका व्यक्ति छन्।</p>
<p>जिल्ला प्रहरी कार्यालय बाँकेमा प्रहरी प्रमुख एसपी वीरबहादुर ओलीले संक्रमण देखिएका आठैजना क्‍वारेन्टाइनमै रहेको र थप विवरण लिने काम भइरहेको बताए।</p>
<p>“उनीहरुको विस्तृत विवरण संकलन गरिरहेका छौं,” उनले भने, “ट्रेसिङको काम अघि बढाउन टोली खटिएको छ।”</p>
<p>गाउँपालिकाका अनुसार त्यहाँको क्‍वारेन्टाइनमा रहेका व्यक्तिको केही दिनअघि स्वाबको नमूना संकलन गरिएको थियो। भेरी अञ्‍चल अस्पताल नेपालगञ्‍जमा गरिएको परीक्षणका क्रममा आज आठजनामा संक्रमण देखिएको हो। </p>
<p>स्वास्थ्य मन्त्रालयका सहप्रवक्ता डा. समिरकुमार अधिकारीका अनुसार उनीहरू नरैनापुर गाउँपालिकाको वडा नम्बर १, ३ र ५ का १८, २०, २२, २५, २५, २७, ३२ र ३६ वर्षीय पुरुष हुन्। उनीहरूको स्वास्थ्य अवस्था सामान्य रहेको र स्वास्थ्यकर्मीको सम्पर्कमा छन्। यससँगै नेपालमा संक्रमितको संख्या २५८ पुगेको छ।</p>
<p>यो पनि पढ्नुहोस्<br />
<a href="https://dekhapadhi.com/news/12644" target="_blank">बाँकेमा थपिए ८ संक्रमित, नेपालभर २५८ जनामा संक्रमण</a></p>
प्रतिक्रिया दिनुहोस्
.jpg)
