कोभिड-१९ को औषधि बनाउन भारतीय र पाकिस्तानी कम्पनीसँग सम्झौता
<p>नयाँदिल्ली। कोभिड-१९ का बिरामीका लागि अमेरिकामा प्रयोग भइरहेको औषधि रेमडेसिभिरको निर्माता गिलिएडले भारत र पाकिस्तानका कम्पनीसँग उत्पादन सम्झौता गरेको छ।</p>
<p>उक्त अमेरिकी कम्पनीले भारत र पाकिस्तानका पाँचवटा औषधि उत्पादक कम्पनीसँग सम्झौता गरेको हो। दुई मुलुकमा उत्पादित औषधि एक सय २७ वटा मुलुकमा पुर्‍याउने गिलिएडको लक्ष्य छ।</p>
<p>विभिन्न मुलुकमा गरिएको क्लिनिकल परीक्षणमा रेमडेसिभिरको प्रयोगबाट १५ दिनको साटो बिरामी ११ दिनमै ठीक हुने गरेको पाइएको थियो। यो औषधि गिलिएडले इबोला रोगीका लागि तयार पारेको थियो।</p>
<p>गिलिएडका अनुसार भारत र पाकिस्तानका पाँच कम्पनीलाई औषधि बनाउने प्रविधि उपलब्ध गराइने छ। र, तत्काल ती कम्पनीले उत्पादन थाल्न सक्ने छन्।</p>
<p>गिलिएडले भारतीय र पाकिस्तानी कम्पनीहरूसँग कोभिड-१९ लाई लिएर विश्‍व स्वास्थ्य संगठनले आपतकालीन अवस्था नहटाएसम्म र कोभिड-१९ कै लागि खोप या औषधि तयार नभएसम्म रोयल्टी नलिने भएको छ। </p>
<p>भारतका सिप्ला, हेटेरो ल्याब्स, जुबिलेन्ट लाइफ साइन्सेस र माइलन नामका कम्पनीसँग सम्झौता भएको हो। यस्तै, पाकिस्तानको फिरोजसन्स ल्याबोरेट्रिजसँग गिलिएडले सम्झौता गरेको छ।</p>
प्रतिक्रिया दिनुहोस्
.jpg)
