‘जुनुको जुत्ता’को अन्तर्राष्ट्रिय प्रिमियर हुँदै
<p>काठमाडौं। नेपाली छोटो चलचित्र ‘जुनुको जुत्ता’को अन्तर्राष्ट्रिय प्रिमियर हुने भएको छ।</p>
<p>१३ मेदेखि शुरू भएको ‘इन्टरनेशनल सर्ट फिल्म फेस्टिभल ओवरहउसेन’ मा फिल्मले सहभागिता जनाउन लागेको हो।</p>
<p>‘जुनुको जुत्ता’ले हालै अमेरिकाको लस एन्जेल्स इन्टरनेसनल फिल्म फेस्टिभलको ‘इन्डि सर्ट फेस्ट’मा ‘बेस्ट चिल्ड्रेन सर्ट फिल्म’ अवार्ड जितेको थियो।</p>
<p>विश्वकै पुरानो अन्तर्राष्ट्रिय चलचित्र महोत्सवको ६६ औं संस्करणमा ‘जुनुको जुत्ता’ दर्शकलाई देखाइन लागिएको हो।</p>
<p>केदार श्रेष्ठको निर्देशनमा बनेको यो फिल्म अन्तर्राष्ट्रिय प्रतिष्पर्धाको ‘चिल्ड्रेन्स एण्ड युथ फिल्म कम्पिटीसन’ विधा अन्तर्गत १६ मेमा प्रिमियर हुनेछ।</p>
<p>‘जुनुको जुत्ता’मा जुत्ता-चप्पल उल्टो लगाउने सानो नानीको कथा छ। ह्यापी ह्यूज प्रोडक्सन, थिएटर मल र थिएटर सेन्टर फर चिल्ड्रेन नेपालको संयुक्त निर्माण रहेको उक्त चलचित्रलाई सरुन मानन्धरले खिचेका हुन् भने विप्लपराज पोखरेलले सम्पादन गरेका हुन्।</p>
<p>फिल्ममा ५ वर्षीय हिस्सी लामा, याङ्जी लामा शेर्पा, पासाङ ल्हामू लामा, खड्क कुमारी लगायतको अभिनय छ।</p>
<p>१९५४ देखि जर्मनीमा आयोजना हुँदै आएको इन्टरनेसनल सर्ट फिल्म फेस्टिभल यो पटक भने कोरोनाका कारण अनलाइन संस्करण आयोजना भइरहेको छ।</p>
प्रतिक्रिया दिनुहोस्
.jpg)
