'नेपालमा देखिएको कोरोना भाइरस जटिल खालको होइन'
<p>काठमाडौं। स्वास्थ्य तथा जनसंख्या मन्त्रालयका प्रवक्ता डा. विकास देवकोटाले नेपालमा देखिएको कोरोना भाइरस जटिल खालको नभएको बताएका छन्।</p>
<p>प्रतिनिधि सभाको शिक्षा तथा स्वास्थ्य समितिको बैठकमा बोल्दै देवकोटाले संक्रमितमा लक्षण पनि थोरै देखिँदा अरुमा सार्ने सम्भावना पनि कम भएको बताएका हुन्।</p>
<p>यसबाट मृत्युको सम्भावना पनि कम हुने उनको भनाइ थियो।</p>
<p>नेपालमा संक्रमित फेला परेका अधिकांशमा कोभिड-१९ का सम्भावित लक्षण देखिएको छैन। 'ट्राभल हिस्ट्री' र बिरामीहरूको सम्पर्कमा रहेकाहरूको 'कन्ट्याक्ट ट्रेसिङ' को आधारमा गरिएका परीक्षणको क्रममा मात्र पोजिटिभ केस फेला परेको छ।</p>
<p>यहाँ देखिएका संक्रमितहरूमा १५ देखि ४५ वर्ष उमेर समूहका बढी रहेको उनले जानकारी गराएका छन्।</p>
<p>"अन्य मुलुकमा ज्‍येष्‍ठ नागरिकमा संक्रमण बढी भएकाले मृत्युदर पनि बढी छ। यहाँ पनि जेष्ठ नागरिकमा संक्रमण फैलिए त्यही अवस्था हुनसक्छ", देवकोटाले भने, "ज्येष्ठ नागरिकहरूमा रोगसँग लड्ने क्षमता कम हुने भएकाले समुदायस्तरमा कोरोना फैलिए नेपालमा पनि संक्रमितको मृत्यु हुने सम्भावना बढी हुन्छ।"</p>
<p>वैशाख महीनायता संक्रमणको ग्राफ बढ्दै गएकोले आउँदा दिनमा अझै संक्रमित थपिनेतर्फ सचेतना अपनाउनुपर्नेमा जोड दिए।</p>
<p>उनका अनुसार विशेषगरी भारतको उत्तरप्रदेश, उत्तराखण्ड, मुम्बई र दिल्लीबाट फर्किएकाहरूमा संक्रमण पाइएको छ।</p>
<p>उनले भने, "बेलायत, फ्रान्स, बेल्जियम, चीन र युएईबाट आएकाहरूमा देखिएको छ।"</p>
<p>प्रवक्ता देवकटाले समुदायस्तरमा संक्रमण फैलिए अवस्था भयावह हुनसक्ने भन्दै लकडाउनको पूर्ण पालना गर्न आग्रह गरेका छन्।</p>
प्रतिक्रिया दिनुहोस्
.jpg)
