कर्णाली प्रदेश बाहेकका २२ जिल्लामा कोरोनाको संक्रमण, अहिलेसम्म झण्डै ८५ हजारको परीक्षण
<p>काठमाडौं। पीसीआर विधिबाट कोभिड-१९ परीक्षण शुरू भएपछिको १०७ दिनको अवधिमा नेपालभर २२ हजार ६६४ जनाको नमूना परीक्षण गरिएका छन्।</p>
<p>नियमित प्रेस ब्रिफिङको क्रममा स्वास्थ्य मन्त्रालयका प्रवक्ता डा. विकास देवकोटाले आज मात्रै एक हजार ३६३ वटा नमूना परीक्षण गरिएको जानकारी दिए।</p>
<p>९ माघमा चीनबाट आएका विद्यार्थीमा पहिलो संक्रमण फेला परेको थियो। उनको परीक्षण गर्न नमूना विदेश पठाइयो।</p>
<p>नेपालमा १४ माघबाट पीसीआर विधिबाट परीक्षण थालिएको हो।</p>
<p>टेकुस्थित राष्ट्रिय जनस्वास्थ्य प्रयोगशालामा १५ माघमा ४ वटा नमूना परीक्षण गरिएको थियो।</p>
<p>प्रवक्ता देवकोटाका अनुसार १९ चैतबाट आरडीटी किट विधिबाट परीक्षण थालिएकोमा आजसम्म ६२ हजार ३२७ नमूना परीक्षण भएको जनाएको छ।</p>
<p>पछिल्लो २४ घण्टामा दुई हजार ८ जनाको आरडीटी परीक्षण गरिएको छ।</p>
<p>“शुरूमा परीक्षणको दायरा बढाउन सकिएको थिएन्”, उनले भने, “अहिले परीक्षणको दायरा बढाइएको छ।” अहिले देशैभर १८ वटा स्थानमा पीसीआर विधिबाट परीक्षण गर्ने प्रयोगशाला रहेको मन्त्रालयले जनाएको छ।</p>
<p>देशैभर अहिलेसम्म संक्रमितको संख्या २४६ पुगेको छ। तीमध्ये १९८ जना पुरुष र ४८ जना महिला छन्।</p>
<p>३५ जना निको भएर घर फर्किसकेका छन्। मन्त्रालयका अनुसार हालसम्म देशका ६ वटा प्रदेशका २२ जिल्लाहरुमा कोरोना संक्रमण देखिएको छ।</p>
<p>प्रदेश १ का ३, प्रदेश २ का ७ जिल्ला, बागती प्रदेशका ४, गण्डकी प्रदेशका २, प्रदेश ५ का ५ र सुदूरपश्चिम प्रदेशका २ जिल्लामा संक्रमण देखिएको हो।</p>
<p>कर्णाली प्रदेशमा भने अहिलेसम्म संक्रमण देखिएको छैन।</p>
<p>देशैभरका अहिले १५ हजार ६०० जना क्‍वारेन्टाइनमा छन्। क्वारेन्टाइन बेडसंख्या ५३ हजार ८३५ रहेको छ।</p>
<p>संक्रमित र सम्भावित संक्रमित गरेर २७२ जना आइसोलेसनमा रहेका छन्। उपत्यकामा ६ जना र बाँकी अन्य प्रदेशमा रहेको मन्त्रालयको भनाइ छ।</p>
<p>३६ हजार ४६५ जनाले स्वमूल्यांकन फारम भरेका छन्। अहिलेसम्म सम्भावित संक्रमित हुनसक्ने ३५९ जनालाई 'रेड जोन' मा राखिएको छ।</p>
<p>उनीहरू सबैको 'कन्ट्याक्ट ट्रेसिङ' को काम भइरहेको छ।</p>
प्रतिक्रिया दिनुहोस्
.jpg)
