सेनाले खरीद गरेको स्वास्थ्य सामग्री लिन नेपाल एअरलाइन्सको विमान चीन पठाउने तयारी
<p>काठमाडौं। कोभिड-१९ को रोकथाम तथा उपचारका लागि नेपाली सेनाले खरीद गरेको स्वास्थ्य सामग्री लिन नेपाल एअरलाइन्सको विमान यसै साता चीन जाने भएको छ।</p>
<p>यसअघि २३ वैशाखमै निगमको वाइडबडी विमान चीनको ग्वान्जा‌ओ पठाउने तयारी थियो।</p>
<p>तर, चीनमा अन्तर्राष्‍ट्रिय मजदूर दिवस र केही सार्वजनिक बिदा दिइएकाले भन्सारलगायतको आवश्यक प्रक्रिया पूरा गर्न नसकिने भएकाले उडान तत्काललाई स्थगित गरिएको थियो।</p>
<p>सेनाले खरीद गरेको सामग्री कुरिअरको जिम्मा फ्ल्यास फ्रेट लजिस्टिकले पाएको छ। यसै साता चार्टर्ड उडान गर्ने तयारी भएपनि स्वास्थ्य सामग्री ल्याउन कहिले विमान पठाउन लागिएको भन्‍ने उक्त कुरिअर कम्पनीले खुलाएको छैन।</p>
<p>नेपाली सेनाले चीन र भारतबाट अत्यावश्यक स्वास्थ्य सामग्री खरीदका लागि सरकार-सरकार (जीटूजी) मार्फत प्रक्रिया अगाडि बढाएको थियो।</p>
<p>चीनबाट ३४२ टन स्वास्थ्य सामग्री जीटूजी प्रक्रियाबाट खरीद अगाडि बढाइएको थियो।</p>
<p>नेपाली सेनाका प्रवक्ता एवं सहायक रथी विज्ञानदेव पाण्डेका अनुसार निगमको जहाजले चीनबाट झण्डै ३० टन स्वास्थ्य सामग्री ल्याउनेछ।</p>
<p>हवाई मार्गबाट कूल ३० टन सामान आयात गर्न सकिए बाँकी रहेका ३१२ टन सामान भने स्थलमार्ग हुँदै नेपाल-चीन सिमाना तातोपानी ल्याउने सेनाको तयारी छ।</p>
<p>अत्यावश्यक सामान खरीदका लागि सेनाले एक करोड ८४ लाख ४१ हजार ७०६.३५ अमेरिकी डलर भुक्तानी गरिसकेको छ। त्यसमा ढुवानी भाडा भने जोडिएको छैन।</p>
<p>ढुवानीका लागि लाग्ने रकमका सम्बन्धमा रक्षा मन्त्रालय हुँदै अर्थ मन्त्रालयमा आग्रह गरिएको थियो।</p>
प्रतिक्रिया दिनुहोस्
.jpg)
