नेपाल एअरलाइन्सका तीन चार्टर्ड विमान जापान उड्दै
<p>काठमाडौं। नेपाल एअरलाइन्सको विमान एकै साता तीन पटक जापानको नारिता जाने भएको छ।</p>
<p>नेपालमा रहेका जापानी नागरिक र जापानमा अध्ययन गरिरहेका नेपाली विद्यार्थी लिएर नेपाल एअरलाइन्सको विमान जापानको नारिता जान लागेको हो।</p>
<p>२, ४ र ९ जेठमा चार्टर्ड विमान जापान जान लागेको नेपाल एअरलाइन्सका प्रवक्ता अर्चना खड्काले बताइन्।</p>
<p>सुमेघ टुर्स एण्ड ट्राभल्स प्रालिले नेपाल एअरलाइन्सको विमान चार्टर्ड गरेको हो। २ र ४ जेठको उडानको लागि टिकट बुक भइसकेको सुमेघ टुर्स एण्ड ट्राभलले बताएको छ।</p>
<p>जापानको लागि पहिलो चार्टर्ड फ्लाइट भोलि, २ जेठ साँझ ९ बजेको लागि तय भएको छ। उक्त उडानमा २५० जना यात्रुले टिकट काटेका छन्।</p>
<p>बिदामा नेपाल आएका जापानमा अध्ययन गरिरहेका नेपाली विद्यार्थीहरूको भिषा अवधि सकिन लागेपछि उनीहरू जापान फर्किन लागेका हुन्।</p>
<p>सुमेघ टुर्स एण्ड ट्राभल्सले विजनेश क्लासको लागि १८ सय अमेरिकी डलर र इकोनोमिक क्लासको लागि १२ सय अमेरिकी डलर लिएर टिकट काटिरहेको बताएको छ।</p>
<p>दुई उडानको लागि टिकट बुक भइसकेको र ९ जेठमा हुने उडानको लागि भने टिकट उपलब्ध गराइएको ट्राभल्सले जनाएको छ।</p>
<p>नेपाल एअरलाइन्सले गत १९ फागुनबाट जापानको नारितामा नियमित व्यवसायीक उडान शुरू गरेको थियो।</p>
<p>त्यसबेला नेपाल एअरलाइन्सले प्रबद्र्धनात्मक भाडा भनेर एकतर्फी ३७ हजार र दुईतर्फी ७३ हजार रूपैयाँ निर्धारण गरेको थियो।</p>
<p>अहिले सुमेघ टुर्स एण्ड ट्राभल्सले चार्टर्ड फ्लाइटमा इकोनोमिक क्लासको लागि मात्रै १ लाख ४४ हजार रूपैयाँ भाडा तोकेको छ।</p>
<p>यसैगरी, नेपाल एअरलाइन्सको वाइडबडी विमान यसै साता चीन जाने भएको छ।</p>
<p>नेपाली सेनाले खरिदको जिम्मा पाएको स्वास्थ्य सामग्री लिनको लागि नेपाल एअरलाइन्सको विमान चीन जान लागेको हो।</p>
<p>उक्त स्वास्थ्य सामग्री कुरिअरको जिम्मा फ्ल्यास फ्रेट लजिस्टिकले पाएको छ। उक्त कुरिअर कम्पनीले कहिले विमान पठाउन लागिएको भन्‍ने खुलाएको छैन।</p>
प्रतिक्रिया दिनुहोस्
.jpg)
