भक्तपुरमा घरबाहिर निस्कन नपाइने
<p>भक्तपुर। सुनसरीबाट आएकी महिला र रामेछापबाट आएका पुरुष गरी दुईजनामा कोभिड-१९ संक्रमण देखिएपछि भक्तपुरमा घरबाट बाहिर निस्कन निषेध गरिएको छ।</p>
<p>प्रमुख जिल्ला अधिकारी हुमकला पाण्डेको संयोजकत्वमा बसेको जिल्लास्तरीय विपद् व्यवस्थापन समितिको बैठकले सो निर्णय गरेको हो।</p>
<p>प्रजिअ पाण्डेले जिल्लामा कोरोना संक्रमण फैलिन नदिन लकडाउनलाई कडाइका साथ लागू गर्ने निर्णय गरेको जानकारी दिँदै अत्यावश्यक कामबाहेक घर बाहिर निस्कन नदिने गरी कडाइ गरेको जानकारी दिइन्।</p>
<p>उनले भक्तपुरबाट अन्यत्र जान यसअघि जारी गरिएका सबै सवारी पास खारेज गरिएको पनि बताइन्। </p>
<p>अत्यावश्यक वस्तुबाहेक व्यापार, व्यवसाय, उद्योग कलकारखाना सञ्चालनमा रोक लगाउने निर्णय गरिएको छ। भक्तपुर प्रवेश गर्ने र बाहिर जाने अत्यावश्यकबाहेकका व्यक्ति तथा सवारीसाधन निषेध गर्ने, स्थानीय र सरोकारवाला निकायबाट खाद्यान्न तथा आपूर्तिको व्यवस्थापन एवं नियमन गर्ने, विपन्न एवं गरीबसहित खाद्यान्न अभाव भएकालाई राहत उपलब्ध गराउने निर्णय गरिएकाे छ।</p>
<p>संक्रमित व्यक्तिको तत्काल कन्ट्रयाक्ट ट्रेसिङ गर्ने, उनीहरू बस्ने ठाउँ सिल गर्ने, उनीहरूका परिवारका सदस्यको तुरुन्त कोरोना परीक्षण र आवश्यक परे आइसोलेसनमा राखेर उपचार गर्ने निर्णयसमेत भएकाे प्रजिअ पाण्डेकाे भनाइ छ। </p>
<p>त्यस्तै जिल्लाका सबै नगरपालिकाले क्वारेन्टाइन चुस्त दुरुस्त राख्ने, वडामार्फत् आफ्नो क्षेत्रमा बाहिरबाट आएकाको लगत सङ्कलन गर्ने, निगरानी गर्ने, कोरोना परीक्षण गराउने र त्यस्ता व्यक्तिलाई आवश्यकताअनुसार क्वारेन्टाइनमा पठाउने र यसको समन्वय गर्ने निर्णय पनि भएको छ। <em>रासस</em></p>
प्रतिक्रिया दिनुहोस्
.jpg)
