भक्तपुरका संक्रमित नेकपा नेता भीम रावलका सुरक्षा सहयोगी, डेढ महीनादेखि बिदामा थिए
<p>काठमाडौं। भक्तपुरमा हिजो संक्रमण पुष्‍टि भएका २७ वर्षीय युवक नेकपाका स्थायी समिति सदस्य डा. भीम रावलको सुरक्षामा खटिएका सशस्त्र प्रहरी जवान रहेको पुष्‍टि भएको छ। </p>
<p>तर, उनी पछिल्लो डेढ महिनादेखि घर बिदामा रहेको खुलेको छ। नेता रावलका सहयोगी गोविन्द दुवालले ती सुरक्षाकर्मी श्रीमती बिरामी भएपछि बिदा लिएर डेढ महिनाअघि घर गएको बताएका छन्।</p>
<p>“अहिले श्रीमतीलाई निको भएपछि सुरक्षामा आउन खोजेर नेता ज्यूको सुरक्षा हेर्न प्रमुखलाई खबर गरेका रहेछन्,” उनले भने, “यहाँ आउनुअघि स्वास्थ्य परीक्षण गर्न लगाइएको थियो। सशस्त्र प्रहरी बल अस्पतालमा नै गरिएको परीक्षणमा पोजिटिभ देखिएको हो।”</p>
<p>ती सशस्त्र प्रहरी जवानमा कोभिड-१९ को संक्रमण पुष्‍टि भएपछि हिजो राति नै टेकुस्थित अस्पतालमा भर्ना गरिएको छ। युवकको स्थायी घर रामेछाप हो।</p>
<p>उनी केही दिनअघि मात्रै लकडाउनको समयमा सवारी पास बनाएर भक्तपुर आएका थिए। सहयोगी दुवालले अहिले सुरक्षामा खटिएका र अन्य सहयोगी कसैमा कुनै स्वास्थ्य समस्या नरहेको प्रष्‍ट पारे।</p>
प्रतिक्रिया दिनुहोस्
.jpg)
