कोभिड-१९: वुहानका एक करोड १० लाख मानिसमा पुनः परीक्षण गरिँदै
<p>बेइजिङ। कोरोना भाइरसको उद्‍गमस्थल चीनको वुहान शहरको एक करोड १० लाख जनसंख्यामा फेरि परीक्षण थालिएको छ।</p>
<p>१० दिनभित्र सबै जनसंख्याको परीक्षण सक्ने योजना नगरका अधिकारीहरूले अगाडि सारेका छन्। सातादिनभित्र नयाँ ६ बिरामी भेटिएपछि व्यापक परीक्षण थालिएको हो।</p>
<p>११ साताको लकडाउनपछि वुहानलाई ८ अप्रिलमा खुला गरिएको थियो। व्यापार, व्यवसाय विस्तारै उठ्ने क्रममा थिए। सार्वजनिक यातायात सञ्‍चालनमा आएका थिए।</p>
<p>तर, पुनः कोभिड-१९ का बिरामी भेटिएपछि वुहानका बासिन्दामा त्रास फैलिएको छ। र, जनजीवन सामान्य बनाउन चुनौती थपिएको छ।</p>
<p>हिजोदेखि वुहानका सबै जिल्लालाई परिपत्र पठाउँदै १० दिनभित्र परीक्षण सक्न भनिएको छ। यसलाई सरकारले ‘१० दिने संघर्ष’ नाम दिएको छ। </p>
<p>यस अभियानमा ज्येष्‍ठ नागरिक र जनघनत्व बढी रहेका क्षेत्रको सुरक्षा मुख्य प्राथमिकतामा राखिएको अधिकारीहरूले जनाएका छन्।</p>
<p>केही स्वास्थ्य अधिकारीले भने पूरै शहरमा परीक्षण अभियान चलाउनु महँगो र असम्भव भएको बताएका छन्। चोङ्नान अस्पतालको इन्टेन्सिभ केयर युनिटका निर्देशक पेङ चियोङले जोखिम वर्गलाई लक्षित गरेर अभियान शुरु गरिएको बताए।</p>
<p>वुहान विश्वविद्यालयका एक निर्देशकले १० दिनमा ६० देखि ८० लाख जनसंख्याको परीक्षण गर्न सक्ने क्षमता शहरमा रहेको जानकारी दिए।</p>
प्रतिक्रिया दिनुहोस्
.jpg)
