लकडाउनमा उपत्यका बाहिरबाट आएका थिए भक्तपुर र काठमाडौंका संक्रमित
<p>काठमाडौं। काठमाडौं र भक्तपुरमा संक्रमण देखिएका तीनजना व्यक्तिहरु लकडाउनकै समयमा उपत्यका बाहिरबाट आएको खुलेको छ।</p>
<p>काठमाडौंमा संक्रमित देखिएकी ३३ वर्षीया महिला र भक्तपुरमा संक्रमित देखिएकी २५ वर्षीया महिला दुई दिनअघि मात्रै उपत्यका प्रवेश गरेका हुन्।</p>
<p>“२९ वैशाखमा मोटरसाइकलमा सुनसरीबाट आएको देखिन्छ”, भक्तपुरका प्रमुख जिल्ला अधिकारी हुमकला पाण्डेयले भनिन्, “हामी उनको 'कन्ट्याक्ट ट्रेसिङ' को काम गरिरहेका छौं।”</p>
<p>उनी भक्तपुरको मध्यपुर ठिमीमा डेरा गरी बस्दै आएकी थिईन्।<br />
<br />
अर्का पुरुष भक्तपुरकै दुवाकोटमा डेरा गरेर बस्दै आएका छन्। उनले आफ्नो कुनै 'ट्राभल हिस्ट्री' नरहेको बताएका छन्।</p>
<p>तर, स्वास्थ्य मन्त्रालय स्रोतका अनुसार उनी पनि केही दिनअघि मात्रै तराईबाट सवारी पास लिएर उपत्यका प्रवेश गरेका थिए।</p>
<p>सीडीओ पाण्डेयले ती पुरुषमा संक्रमण देखिएको बारे अनुसन्धान भइरहेको <em>देखापढी</em>लाई बताइन्।</p>
<p>काठमाडौंमा संक्रमित देखिएकी ३३ वर्षीया महिला कञ्‍चनपुरको महेन्द्रनगरबाट काठमाडौं आएको भेटिएको छ।</p>
<p>उनी महेन्द्रनगरबाट सवारी पास बनाएर काठमाडौं आएको प्रहरीले जनाएको छ। उनी चन्द्रागिरी नगरपालिकामा बस्दै आएकी थिईन्।</p>
<p>काठमाडौंका प्रमुख जिल्ला अधिकारी जनकराज दाहालले दिएको जानकारी अनुसार काठमाडौंमा संक्रमण पुष्टि भएकी महिलाको 'ट्राभल हिस्ट्री' र 'कन्ट्याक्ट ट्रेसिङ' को काम भइरहेको छ।</p>
<p> तीनैजना संक्रमितलाई गएराति नै टेकुस्थित शुक्रराज ट्रपिकल तथा सरुवा रोग अस्पताल भर्ना गरिसकिएको छ।</p>
<p>नेपालमा हिजो, ३० वैशाख एकैदिन ८३ जनामा कोरोना भाइरसको संक्रमण पुष्टि भएको हो। अहिलेसम्म नेपालमा संक्रमितको संख्या २१७ पुगेको छ।</p>
प्रतिक्रिया दिनुहोस्
.jpg)
