तत्काल लकडाउन नखोलौंः अमेरिकी विज्ञ
<p>वासिङ्टन। अमेरिकाका वरिष्‍ठ संक्रामक रोग विशेषज्ञ डा. एन्थोनी फाउसीले तत्काल कोभिड-१९ विरुद्धको खोप तयार नहुने स्पष्‍ट पारेका छन्। सोही कारण लकडाउन खोल्ने सिनेटरहरूको माग गलत भएको उनले बताए।</p>
<p>“लकडाउन हटाउन हतार गरियो भने कोरोना भाइरस तीव्र गतिमा फैलिनेछ र लाखौं मानिसलाई आफ्नो चपेटामा पार्नेछ,” उनले भने।</p>
<p>अमेरिकी राष्‍ट्रपति डोनाल्ड ट्रम्प लकडाउन खोल्ने तयारीमा रहेकै बेला डा. एन्थोनीले उक्त कदम गलत हुने चेतावनी दिएका हुन्। अर्थतन्त्रलाई चलायमान बनाउन लकडाउन खोल्न आवश्यक रहेको ट्रम्पले दाबी गर्दै आएका छन्।</p>
<p>डा. एन्थोनीले अमेरिकी सिनेटलाई भिडिओ कन्फरेन्सिङमार्फत सम्बोधन गर्दै लकडाउन कायम राख्न आग्रह गरेका हुन्। जहाँ जहाँ लडाउन खुल्यो, त्यहीं कोराना भाइरसको संक्रमण तीव्रतर बढेको उनले उल्लेख गरे।</p>
<p>मानिसको ज्यानभन्दा ठूलो अर्थव्यवस्था नभएको उनले प्रष्‍ट्याए। सेप्‍टेम्बरमा संक्रमण दोस्रोपटक शुरु हुन सक्ने भविष्‍यवाणी पनि उनले गरे। कोरोना भाइरस संक्रमणको दोस्रो लहरको सम्भावनालाई पनि नजरअन्दाज नगर्न सचेत गराए।</p>
<p>कोभिड-१९ विरुद्धको खोप तयार पार्ने कोशिस भइरहेको उल्लेख गर्दै उनले तर त्यो कहिलेसम्ममा तयार भइसक्छ भन्‍ने ग्यारेन्टी नभएको बताए।</p>
प्रतिक्रिया दिनुहोस्
.jpg)
