ज्यान मार्ने धम्की आएकाे भन्दै बाँके सोनपुरकाे स्वास्थ्यचौकी बन्द
<p>बाँके। खजुरा गाउँपालिका-७, सोनपुरस्थित स्वास्थ्यचौकीमा ताला लगाइएको छ।</p>
<p>स्वास्थ्यकर्मी तथा कर्मचारीमाथि ज्यान मार्ने धम्की आएकाे भन्दै स्वास्थ्यचौकी बन्द गरिएको हो।</p>
<p>स्वास्थ्यचौकीमा नजन्मेको शिशुलाई त्यहीँ जन्मेको प्रमाणीकरण गरिदिनुपर्ने माग अस्वीकार गर्दा धम्की आएकाे त्यहाँ कार्यरत स्वास्थ्यकर्मी तथा कर्मचारीहरूले बताएका छन्।</p>
<p>उनीहरूले यसअघि स्वास्थ्यकर्मी र कर्मचारीले प्रहरीसँग सुरक्षा माग गरेका थिए।</p>
<p>कर्मचारीलाई कार्यालय बाहिर भेटे हातखुट्टा भांँच्नेसम्मको धम्की दिएको र कार्यालयमा आई कर्मचारीमाथि अभद्र व्यवहार गरेको स्वास्थ्यचौकी इञ्चार्ज सुदीप पौडेलले बताए।</p>
<p>कार्यालय परिसरमै आएर केही व्यक्तिहरूले स्वास्थ्यचौकीमा कार्यरत स्वास्थ्यकर्मी तथा कर्मचारीलाई धम्की दिएपछि आजदेखि स्वास्थ्यचौकी बन्द गरिएको हाे।</p>
<p>पाैडेलका अनुसार काम गर्ने वातावरण नभएकाले सुरक्षाको प्रत्याभूति दिलाउन धम्की दिनेमाथि कानूनी कारबाही गर्न यसअघि इलाका प्रहरी कार्यालय धनौलीमा लिखित निवेदन दिइएको थियो।</p>
<p>स्वास्थ्यचौकीमा नजन्मेको शिशुलाई स्वास्थ्यचौकीमै जन्मेको प्रमाणीकरण गरिदिन दिएकाे दबाब अस्वीकार गर्दा रफी भाटसहितका व्यक्तिले धम्की दिएकाे स्वास्थ्यचाैकी इन्चार्ज पाैडेल बताउँछन्।</p>
<p>२६ वैशाखमा स्वास्थ्यचौकीमा प्रसूति गराउन आएकी भाटकी श्रीमतीलाई स्वास्थ्यचौकीका कर्मचारीले सुत्केरी व्यथा नलागेको भन्दै घर फर्काएका थिए।</p>
<p>घरमै सुत्केरी भए पनि स्वास्थ्यचौकीमै शिशु जन्मिएको प्रमाणीकरण हुनुपर्ने भाटको माग अस्वीकार गर्दा धम्की खेप्नु परेकाे पाैडेलकाे भनाइ छ। </p>
<p>इलाका प्रहरी कार्यालय धनौलीका इञ्चार्ज प्रहरी निरीक्षक प्रहरी पोषणराज थपलियाले घटनाबारे अनुसन्धान भइरहेको बताए। <em>रासस</em></p>
प्रतिक्रिया दिनुहोस्
.jpg)
