चलचित्र विकास बोर्डमा कसले मार्ला बाजी ?
<p>काठमाडौं। चलचित्र विकास बोर्डको अध्यक्षका लागि १० जनाको आवेदन परेको छ।</p>
<p>बोर्ड अध्यक्ष केशव भट्टराईको निधनपछि ६ महीनादेखि रिक्त रहेको उक्त पदका लागि सञ्चार तथा सूचना प्रविधि मन्त्रालयले १६ वैशाखमा सूचना जारी गरेको थियो।</p>
<p>मन्त्रालयका अनुसार आज अन्तिम दिनमा बोर्डको अध्यक्षका लागि १० जनाले निवेदन दिएका छन्।</p>
<p>बोर्ड अध्यक्षका लागि अभिनेता भूवन केसी, निर्माता अर्जुनकुमार डङ्गोल, निर्देशक दयाराम दाहाल, कलाकार सोहित मानन्धरलगायतको उम्मेदवारी परेको छ।</p>
<p>त्यस्तै लय संग्रौला, राजेन्द्र उप्रेती, राजेश थापा, ध्यानबहादुर सुब्बा, परशुनारायण चौधरी र दीपक श्रेष्ठले पनि आवेदन दिएका छन्।</p>
<p>आवेदनमाथि आवश्यक छलफल तथा अनुसन्धानपछि बोर्डको अध्यक्ष नियुक्त गरिने मन्त्रालयका प्रवक्ता ऋषिराम तिवारीले जानकारी दिए। आवेदन दिएकाहरूमध्येबाट प्रतिस्पर्धा गराएर अध्यक्ष बनाइने तिवारीके भनाइ छ।</p>
<p>चलचित्रकर्मी तथा चलचित्र क्षेत्रको समस्याका विषय जानकार रहेको भन्दै आवेदन दिने सबैले बोर्डको अध्यक्ष आफूले पाउनुपर्ने दाबी गरेका छन्।</p>
<p>नायक भूवन केसीले चलचित्र क्षेत्रमा गरेको योगदानको मूल्यांकन गरेर अघि बढ्दा आफूलाई कुनै आपत्ति नरहेको जनाए।</p>
<p>चार दशकदेखि चलचित्र क्षेत्रबाहेक अन्य पेशाका विषयमा समेत आफूले नसोचेको भन्दै राजनीतिक स्वार्थभन्दा योगदानका आधारमा मूल्यांकन गर्न मन्त्रालयसँग आग्रह गरे।</p>
प्रतिक्रिया दिनुहोस्
.jpg)
