चीनको वुहानमा कोरोना भाइरसको नयाँ क्लस्टर
<p>बेइजिङ। कोरोना भाइरसको उत्पत्ति स्थल चीनको वुहान शहरमा यसको नयाँ क्लस्टर फेला परेको छ। उस्तै प्रकृतिको केस उत्तरपूर्वी प्रान्त जिलिनमा पनि देखिएको छ।</p>
<p>गत ३ अप्रिलमा लकडाउन अन्त्य गरिएयता वुहानमा हिजो नयाँ पाँचजना बिरामी फेला परेका छन्। उनीहरू सबै वुहानकै बासिन्दा हुन्। अर्थात्, विदेशबाट आएका व्यक्तिबाट नभई स्थानीय स्तरमै कोरोना भाइरसको संक्रमण देखिएको छ।</p>
<p>कोभिड-१९ का बिरामी घट्दै गएपछि चीनले पछिल्ला दिनमा लकडाउनलाई खुकुलो पार्दै लगेको छ। स्वास्थ्य अधिकारी र विज्ञहरूले भने लकडाउन खुकुलो बनाउनु घातक कदम हुन सक्ने चेतावनी दिँदै आएका थिए। किनकि, मानिस स्वतन्त्र विचरण गर्दै गर्दा कोराना भाइरसको संक्रमण फैलिने सम्भावना अझ बढ्ने उनीहरूको भनाइ छ।</p>
<p>वुहानमा एक ८९ वर्षीय व्यक्तिकी पत्नीमा एक महीनापछि पहिलोपटक कोरोना भाइरसको संक्रमण देखिएको हो। उनीसहितका पाँच जनामा यसअघि कोभिड-१९ को लक्षण देखिएको थियो तर क्लिनिकल परीक्षणमा भाइरस देखिएको थिएन। वुहानमा यस्ता सयौं केस यसअघि देखिएका थिए। </p>
<p>यसैबीच, रुस र उत्तरकोरियाको सीमास्थित जिलिन प्रान्तको सुलान शहरमा कोभिड-१९ का ११ बिरामी थपिएका छन्। उनीहरू सबै स्थानीय स्तरमै संक्रमणमा परेको चिनियाँ सञ्‍चार माध्यमहरूले जनाएका छन्।</p>
प्रतिक्रिया दिनुहोस्
.jpg)
