महामारीले समस्यामा परेका खेलाडीका परिवारलाई सविता र किशाेरकाे सहयाेग
<p>काठमाडौं। एशियाली खेलकुदमा तेक्वान्दोबाट रजत पदक जितेकी सविता राजभण्डारी र उनका पति किशोर श्रेष्ठले कोभिड-१९ महामारीका कारण समस्यामा परेका खेलाडीका परिवारलाई खाद्यान्न सहयाेग गरेका छन्। </p>
<p>उनीहरूले कमजोर आर्थिक अवस्था भएका खेलाडीका परिवारलाई राहतस्वरूप खाद्य सामाग्री सहयोग गरेका हुन्।</p>
<p>सविताको तर्फबाट राष्ट्रिय खेलकुद परिषद्का सदस्यसचिव रमेशकुमार सिलवालले नेपाल क्योकुसिन सेइसिन काइकान कराते संघका अध्यक्ष अशोककुमार श्रेष्ठलाई साे खाद्य सामग्री हस्तान्तरण गरे। </p>
<p>समस्यामा परेका १५० खेलाडीका परिवारकाे पहिचान गरी साे खाद्य सामग्री वितरण गरिनेछ।</p>
<p>उपत्यका र आसपासका जिल्लाको क्योकुसिन कराते खेलाडीलाई चामल, तेल, नुन, गेडागुडी, मसेउरा, सोयाबिन र साबुन प्रदान गरिएको संघकी उपाध्यक्ष हेमा मानन्धरले जानकारी गराइन्।</p>
<p>सविता र किशोरकै सहयोगमा यसअघि काठमाडौं महानगरपालिका-११ का दैनिक ज्यालादारी गरी गुजारा चलाउने मजदुरलगायत प्रभावित <a href="https://dekhapadhi.com/news/11982" target="_blank">२०० परिवारलाई राहत</a> वितरण गरिएको थियो।</p>
<p>त्यसबेला पनि सदस्य–सचिव सिलवालले वडाध्यक्ष हीरालाल तण्डुकारलाई राहत हस्तान्तरण गरेका थिए। </p>
<p>सविता १९९८ को बैंकक एशियाडकी रजत पदक विजेता हुन्। किशोरले पनि सोही एशियाडमा कांस्य जितेका थिए। उनीहरू लामो समयदेखि अमेरिकाको सियाटलमा बस्दै आएका छन्।</p>
प्रतिक्रिया दिनुहोस्
.jpg)
