ट्रम्पको भित्री सर्कलमै घुस्यो कोरोना भाइरस
<p>वासिङ्टन। प्रेस सेक्रेटरीलाई कोभिड-१९ पोजिटिभ देखिएपछि अमेरिकी उपराष्‍ट्रपति माइक पेन्स सेल्फ आइसोलेसनमा बसेका छन्।</p>
<p>उनकी प्रेस सेक्रेटरी क्याटी मिलरलाई गत शुक्रबार कोरोना भाइरसको संक्रमण पुष्‍टि भएको थियो।</p>
<p>मिलरमा संक्रमणसँगै कोरोना भाइरसको पेचिलो परिस्थितिमा परेका छन्, अमेरिकी राष्‍ट्रपति डोनाल्ड ट्रम्प। मिलरले ट्रम्पका निकटतम सल्लाहकार स्टेफेन मिलरसँग विवाह गरेकी छन्। खासगरी, अध्यागमन कारवाहीको पाटोमा मुख्य डिजाइनर रहेको मानिन्छ, स्टेफेनलाई।</p>
<p>ह्वाइटहाउसमा हुने शनिबारको नियमित बैठकमा उपराष्‍ट्रपति पेन्स सहभागी भएनन्। राष्‍ट्रपति ट्रम्प र उच्च सैन्य अधिकारीहरूसँगको बैठक थियो त्यो।</p>
<p>उपराष्‍ट्रपति पेन्ससँगै जलसेनाका अपरेसन प्रमुख माइकल गिल्डे र नेसनल गार्ड ब्युरोका प्रमुख एयरफोर्स जर्नेल जोसेफ लेंग्येल पनि बैठकमा अनुपस्थित रहे। उनीहरू दुवैमा कोभिड-१९ पोजिटिभ देखिएको छ।</p>
<p>हुँदाहुँदा ह्वाइटहाउस पुगेर फर्केका आयोबाका गभर्नर किन रेनोल्ड्समा पनि कोरोना भाइरस पोजिटिभ देखिएको छ। उनी गत बुधबार ह्वाइटहाउसमा प्रवेश गरेका थिए।</p>
<p>यही परिस्थितिबीच राष्‍ट्रपति ट्रम्पले अमेरिकी नागरिकहरूलाई व्यापार, व्यवसाय खोल्न आग्रह गर्दै आएका छन्। लामो समय व्यापार, व्यवसाय बन्द रहँदा अर्थतन्त्रमा धक्का पुग्‍ने उनको भनाइ छ।</p>
<p>नजिकिँदो राष्‍ट्रपति निर्वाचनबीच उनले अमेरिकी नागरिकलाई ‘योद्धा’को संज्ञा दिँदै आफ्नो पक्षमा तान्‍ने प्रयास गरिरहेका छन्। </p>
<p>हिजो ट्रम्पले आफूलाई सन् २००९ का राष्‍ट्रपति बाराक ओबामासँग तुलना गर्दै ट्विट गरे। त्यतिबेला एच१एन१ को फ्लु नियन्त्रणमा ओबामाले पाएको जस्तै सफलता अहिले आफूले कोरोना भाइरसविरुद्ध प्राप्त गरिरहेको उनको दाबी छ।</p>
प्रतिक्रिया दिनुहोस्
.jpg)
