नदी कटानकाे उच्च जाेखिममा छन् सीमास्तम्भ
<p>कैलाली। कर्णाली नदीले नेपाल-भारत सीमा क्षेत्रको टीकापुर नगरपालिकाका केही भागमा तीव्र कटानी गरिरहेको छ।</p>
<p>यतिबेला कर्णाली नदीले टीकापुर नगरपालिका-८, श्रीलंका टापुमा तीव्र कटानी गरिरहेको हाे। </p>
<p>नदी कटानले जमिन मात्रै नभएर सीमा क्षेत्रमा रहेका सीमास्तम्भहरू समेत जोखिममा परेका छन्। </p>
<p>पिल्लर नम्बर ७०१/१ नम्बरको सहायक सीमास्तम्भ नदीमा बग्न थोरै मात्र बाँकी छ। सीमास्तम्भ रहेको ठाउँबाट झण्डै एक मिटरको दूरीमा नदी कटान गर्दै पुगिसकेको छ।</p>
<p>सीमास्तम्भ कुनै पनि बेला नदीमा विलय हुने सम्भावना छ।</p>
<p>टीकापुर नगरपालिकाका मेयर तपेन्द्रबहादुर रावलले चाहेर पनि सीमास्तम्भ जोगाउने अवस्था नरहेको बताए।</p>
<p>उनले नेपालतर्फको थुप्रै भू-भाग नदीले बगाइसकेको बताउँदै सीमास्तम्भ जोगाउनै मुस्किल भएको बताए। उनले उक्त पिल्लरतर्फको भाग भारतमा पर्ने र उक्त क्षेत्रमा कर्णाली नदी बगिरहेका कारण समस्या भएको बताए। </p>
<p>कर्णाली र मोहना नदीले अहिलेसम्म टीकापुर नगरपालिकाभित्रका चार मुख्य र १० सहायक सीमास्तम्भ बगाइसकेको छ।</p>
<p>अहिलेसम्म नगरपालिकाभित्रका मुख्य सीमा स्तम्भ ७०१, ७०३, ७०४ र ७०६ र सहायक सीमास्तम्भहरू ७०२/२ देखि ७०२/७ सम्म, ७०४/३, ७०४/४, ७०४/६ र ७०५/३ नदीले बगाइसकेका छन्।</p>
<p>ती सीमास्तम्भ हराएकाेबारे दुई देशको सीमा सर्भे टोलीको रिपोर्टमा समेत उल्लेख गरिएको छ । </p>
<p>१०१ किलोमिटर क्षेत्रफल रहेको कैलालीमा जम्मा २८२ सीमास्तम्भ छन्, जसमध्ये ५३ मुख्य र बाँकी सहायक सीमा स्तम्भ रहेको सीमा सर्भे टोली नेपालतर्फको टोली नं. ४ का टीम लिडर सुदर्शन धामीले जानकारी दिए।</p>
प्रतिक्रिया दिनुहोस्
.jpg)
