बुन्डेसलिगा शुरू हुनु एक साताअघि ड्रेस्डेनको पुरै टीम आइसोलेसनमा
<p>काठमाडौं। जर्मनीको दोस्रो श्रेणी लिगको क्लब डायनामो ड्रेस्डेनका दुई खेलाडीमा कोरोना भाइरस संक्रमण देखिएपछि सम्पूर्ण टीम सदस्य र स्टाफलाई दुई साताको लागि आइसोलेसनमा राखिने भएको छ।</p>
<p>कोरोना भाइरस संक्रमणका कारण स्थगित बुन्डेसलिगा र बुन्डेसलिगा २ आउँदो शनिबार (३ जेठ) बाट पुनः शुरू गर्ने तयारीमा छ।</p>
<p>कोभिड-१९ को जोखिमका कारण स्थगित भएर पुनः शुरू हुन लागेको बुन्डेसलिगा युरोपको पहिलो लिग हुनेछ।</p>
<p>‘‘अबको १४ दिनसम्म हामी न त ट्रेनिङ गर्न पाउँछौं न अभ्यास नै गर्न पाउछौं,’’ डायनामोले भनेको छ।</p>
<p>जर्मन फुटबल संघ (डीएफबी)ले बिहीबार खेल स्वास्थ्य प्रोटोकलको कडा पालना गरेर सिजन शुरूआत गर्ने बताएको थियो।</p>
<p>डीएफबीका अनुसार रंगशालामा समर्थकलाई प्रवेश निषेध गरिनेछ भने सबै खेलाडीको कोभिड-१९ परीक्षण हुनेछ।</p>
<p>खेल सयममा रंगशालाभित्र खेलाडी, कर्मचारी र अफिसियल गरी मैदानमा तीन सयको हाराहारीमा मान्छे हुनेछन्।</p>
<p>कोरोना भाइरसका कारण जर्मनीमा १३ मार्चबाट फुटबल स्थगित भएको थियो। लिग शुरू हुने भएपछि अप्रिलको मध्यबाट क्लबहरूले ट्रेनिङ शुरू गरेका थिए।</p>
<p>तर, बुन्डेसलिगा टू को पुछारमा रहेको ड्रेस्डेनले लिग पुन शुरू भए पनि आफूहरूले शुरूका खेल खेल्न नसक्ने बताएको छ।</p>
<p>‘‘केही सातायता हामीले निर्धारित सबै मेडिकल र स्वास्थ्य सरक्षाका उपायहरू कडाईका साथ लागु गर्नका लागि सबैले अथक प्रयास गरेका छौं,’’ ड्रेस्डेनका खेलकुद निर्देशक राल्फ मिन्गेले भने, ‘‘जिम्मेवार स्वास्थ्य अधिकारी र जर्मन फुटबल लिगसँग निरन्तर सम्पर्कमा छौं र अब कसरी अघि बढ्ने विषयमा समन्वय गरिरहेका छौं।’’</p>
<p>ड्रेस्डेनले १७ मेमा हानोभर ९६ विरुद्धको खेलबाट सिजनको पुन शुरूआत गर्दैथियो।</p>
प्रतिक्रिया दिनुहोस्
.jpg)
