तनहुँमा पासोमा पर्यो चितुवा, अहिलेसम्म सात चितुवा नियन्त्रणमा
<p>तनहुँ। बन्दीपुर गाउँपालिका-३ शेराटारमा आज बिहान एउटा चितुवा खोरमा परेको छ।</p>
<p>चितुवाको आतंक बढेपछि तनहुँमा डिभिजन वन कार्यालयले नै गाउँलेको सहयोगमा पासो थाप्दै आएका छन्।</p>
<p>बाख्रासहितको खोरमा परेर नियन्त्रणमा लिइएको चितुवालाई उद्धार गरेर डिभिजन वन कार्यालय तनहुँले ल्याएको डिभिजन वन प्रमुख केदार बरालले बताए।</p>
<p>“खोरमा परेको चितुवा दमौली ल्याउँदैछौं, यसलाई कहाँ लैजाने भन्नेबारेमा छलफल हुँदैछ”, बरालले भने।</p>
<p>तनहुँका विभिन्न ठाउँमा चितुवाको आक्रमणबाट बालबालिकाको मृत्यु हुने क्रम बढेपछि डिभिजन वन कार्यालय तनहुँले काठको खोर थापेर चितुवा नियन्त्रणमा लिने प्रयास गरिरहेको छ ।</p>
<p>यसअघि भानु नगरपालिकामा पाँच, व्यास नगरपालिकामा एक र बन्दीपुर गाउँपालिकामा एक गरी सात चितुवा पासोमा परेको थियो।</p>
<p>२० महीनाको अवधिमा तनहुँमा चितुवाको आक्रमणबाट नौ बालबालिकाले ज्यान गुमाएका छन् । <em>रासस</em></p>
प्रतिक्रिया दिनुहोस्
.jpg)
