सडक खन्न भेला भएका गाउँले हटाउन खोज्दा दैलेखमा प्रहरीमाथि आक्रमण, दुई राउण्ड हवाईफायर
<p>दैलेख। दैलेखको चामुण्डा बिन्द्रासैनी नगरपालिका-४ मा स्थानीयवासीले ढुङ्गामुढा गरेपछि प्रहरीले दुई राउण्ड हवाईफायर गरेको छ।</p>
<p>ढुङ्गामुढासहित प्रहरी र स्थानीयवासीबीच शनिबार हिजो साँझ ७ बजेतिर झडप हुँदा प्रहरी जवान खगेन्द्र सुनार र स्थानीय कमल शाही घाइते भएको प्रहरीले जनाएको छ।</p>
<p>सालटाकुरा नाव-साल्टाडाँडा सडक निर्माणका क्रममा लकडाउनको उल्लंघन गरी ५०/६० स्थानीयवासी जम्मा भएको जानकारी पाएपछि प्रहरी सो ठाउँमा पुगेको थियो। </p>
<p>स्थानीयवासीले प्रहरीमाथि आक्रमण गरेपछि बाध्य भएर भीड नियन्त्रणमा लिन जवाफी कारवाहीमा दुई राउण्ड हवाईफायर गर्नुपरेको जिल्ला प्रहरी कार्यालय दैलेखका प्रमुख हरिबहादुर ओलीले बताए।</p>
<p>“लकडाउन उल्लङ्घन गरी सडक खन्ने क्रममा विवाद भएको जानकारीपछि बोलाइएको प्रहरीमाथि आक्रमण हुँदा सो घटना भएको हो”, नगरपालिकाका उपप्रमुख तारा शाहीले भनिन्।</p>
<p>हिजो दिउँसो मात्रै सहमतिका आधारमा सडक खन्ने भनेर काम गर्न आग्रह गरिएको थियो ।</p>
<p>उपप्रमुख शाहीले आफूहरु दिउँसो त्यहीँ बसेको र मान्छेहरुको भीडभाड पनि धेरै भएकाले आफूहरुले प्रहरीलाई त्यहाँ पठाएको बताएकी छन्।</p>
<p>अहिले घटनास्थलमा थप सुरक्षा बल दुल्लूबाट पठाइएको र स्थिति सामान्य भएको प्रहरीले बताएको छ।</p>
<p>घटनाको थप अनुसन्धान हुने र आवश्यक छानबिन गरी कारवाही अघि बढाइने दैलेखका प्रमुख जिल्ला अधिकारी युवराज कट्टेलले बताए।</p>
<p>प्रदेश सरकारको २० लाख र नगरपालिकाको पाँच लाख साझेदारीसहित २५ लाख रकममा उपभोक्ता समितिमार्फत उक्त सडक निर्माण कार्य भइरहेको थियो । <em>रासस</em></p>
प्रतिक्रिया दिनुहोस्
.jpg)
