सीमाबाट फर्काइएका १८० नेपालीको विनय : 'महाकाली पुलको ढोका खोल, पराई भूमिमा मर्न नदेऊ'
<p>कैलाली। भारतको उत्तराखण्डको विभिन्‍न ठाउँबाट झण्‍डै १२० किलोमिटर पैदल हिँडेर नेपाली सीमा आइपुगेका १८० नेपालीलाई भारतीय सीमा सुरक्षा बल एसएसबीले फर्काएको छ।</p>
<p>हिजो बिहान झिसमिसेमा महेन्द्रनगरको सीमापारि बाबाथान आइपुगेका उनीहरूलाई राति ११ बजे कुटपिट गर्दै सीमामा तैनाथ भारतीय सुरक्षाकर्मीले रुद्रपुर पुर्‍याएका छन्।</p>
<p>घर फर्कने आशामा आएका उनीहरूलाई बसमा कोचाकोच गरेर लगेपछि खुशी क्षणभरमै मेटिएको छ।</p>
<p>तीन दिन लगातार हिँडेका उनीहरुलाई हिजो, २७ वैशाखमा काँग्रेस आई उत्तर प्रदेशका महासचिव भुवन कापडीको नेतृत्वमा खाना खुवाइएको थियो।</p>
<p>त्यहाँका सुरक्षाकर्मीले उनीहरूलाई एक महीना बढी बसेकै क्वारेन्टाइनमा लगेर छाडेका छन्। केही दिनअघि प्रहरीले उनीहरूलाई क्वारेन्टाइनबाट निकालेको थियो।</p>
<p>"विकल्प पनि छैन। आशाका त्यान्द्रो केही बाँकी रहेन", डडेल्धुराको पर्शुराम नगरपालिका-४ कुर्मुल्लेका सुशिल जोशीले भने, "हामीलाई बचाईदिनुपर्‍यो, बाँच्न चाहन्छौं।"</p>
<p>सँगै रहेका उनका साथीहरू नेपाल सरकारसमक्ष घर फर्किने वातावरण बनाइदिन पहलका लागि याचना गरिरहेका थिए।</p>
<p>"महाकाली पुलको ढोका खोलिदिन बिन्ति गर्छौं। भारतीय प्रहरीले एक ठाउँबाट लखेटेर कतिखेर कहाँ पुर्‍याउँछ थाहा छैन", न खान न त सुत्‍न नै पाएका छौं। कि हामीलाई नागरिक होइन भन। हामी मर्नै परे, आफ्नै देशमा मर्न चाहन्छौं। पराई भूमिमा हामीलाई मर्न नदेऊ", जोशीले भने।</p>
प्रतिक्रिया दिनुहोस्
.jpg)
