समान पारिश्रमिकको मुद्दा खारेजीविरुद्ध अमेरिकी महिला फुटबल टीमले गर्याे अपिल
<p>काठमाडौं। समान तलब पाउनुपर्ने मागसहित दर्ता गरेको मुद्दा अदालतले खारेज गरेपछि अमेरिकी महिला फुटबल टीमले त्यसविरुद्ध अपिल दर्ता गरेकाे छ।</p>
<p>एक साताअघि अमेरिकी पुरुष टीमको तुलनामा आफूहरूले न्यून तलब पाएको भन्दै महिला खेलाडीहरूले दायर गरेको मुद्दालाई एक न्यायाधीशले खारेज गरिदिएका थिए।</p>
<p>महिला टीमका २८ खेलाडीले अमेरिकी फुटबल संघविरुद्ध गत वर्ष मुद्दा दायर गरेका थिए। समान ज्याला ऐनअन्तर्गत उनीहरूले ६ करोड ६० लाख अमेरिकी डलर क्षतिपूर्ति माग गरेका थिए।</p>
<p>खेलाडीको तर्फबाट प्रवक्ता रहेकी मोली लेभिनसनले अदालतको निर्णयविरुद्ध हिजाे अपिल गरेको बताएकी छन्।</p>
<p>‘‘समान तलब भनेको पुरुष खेलाडीले जुन दरमा पारिश्रमिक पाउँछन्, महिला खेलाडीले पनि त्यही दरमा पाउनुपर्छ भन्ने हो’’, लेभिसनले भनिन्।</p>
<p>अमेरिकी महिला टीमले गत वर्ष महिला विश्वकपको उपाधि जितेको थियो। अमेरिकी महिला फुटबल टीमको यो चौथो विश्वकप उपाधि थियो। उनीहरूले ओलम्पिकमा पनि स्वर्ण पदक जितेका थिए।</p>
प्रतिक्रिया दिनुहोस्
.jpg)
