चार लाख भारतीयलाई ‘एयरलिफ्ट’ गर्दै एयर इन्डिया
<p>नयाँदिल्ली। भारतको राष्‍ट्रिय ध्वजावाहक एयर इन्डियाले विदेशमा फसेका करिब चार लाख भारतीय नागरिकलाई ‘एयरलिफ्ट’ गर्दै स्वदेश फर्काउने भएको छ।</p>
<p>नयाँदिल्लीस्थित इन्दिरा गान्धी अन्तर्राष्‍ट्रिय विमानस्थलमा चिकित्सकहरूले उनीहरूको स्वास्थ्य जाँच गर्ने छन्।</p>
<p>समाचार एजेन्सी रोयटर्सका अनुसार अमेरिका, बेलायत, मध्यपूर्व र दक्षिणपूर्वी एशियाली मुलुकमा रहेका भारतीय नागरिकलाई फर्काउने योजना बनाइएको हो। </p>
<p>यसअघि भारतीय नौसेनाले माल्दिभ्समा फसेका भारतीयको उद्धारका लागि युद्धपोत पठाइसकेको छ। </p>
<p>भारतीय टेलिभिजन च्यानलहरूमा व्यक्तिगत सुरक्षा सामग्री (पीपीई) पहिरिएका एयर इन्डियाका चालक दलका सदस्यहरूलाई देखाइएको छ, जो युनाइटेड अरब इमिरेट्सको अबुधावीबाट यात्री लिएर नयाँदिल्ली उड्ने तयारीमा थिए।</p>
<p>विदेशमा रहेका भारतीय नागरिकहरूले आर्थिक र भावनात्मक समस्याका कारण स्वदेश फर्किने इच्छा देखाएपछि सरकारले धमाधम उद्धार गर्न थालेको हो।</p>
<p>१५ मेसम्ममा दुई लाख नागरिकलाई घर फर्काउने सरकारी तयारी छ। यस्तै, १५ जुनदेखि थप साढे तीन लाखदेखि चार लाख भारतीय स्वदेश फर्किने छन्।</p>
<p>सिंगापुरबाट स्वदेश फर्किन लागेका अढाइ सय भारतीय नागरिकको एकसाथ स्वास्थ्य जाँच गरिएको छ।</p>
<p>स्वदेश फर्काइएका सबैलाई १४ दिनसम्म क्‍वारेन्टाइनमा राख्‍ने सरकारी योजना छ। त्यसका लागि विभिन्‍न राज्यका होटेल, कलेज, होस्टेल र खाली घरहरूलाई क्‍वारेन्टाइनमा बदल्ने सरकारी योजना छ।</p>
प्रतिक्रिया दिनुहोस्
.jpg)
