थप ७ जनामा कोरोना संक्रमण, संक्रमितको संख्या १०९ पुग्यो
<p>काठमाडौं । उदयपुर, कपिलवस्तु र पर्सामा थप सातजनामा कोरोना भाइरसको संक्रमण पुष्टि भएको छ । यससँगै नेपालमा संक्रमितको संख्या एक सय नौ पुगेको छ।</p>
<p>उदयपुर, कपिलवस्तु र पर्सामा आज थप सातजनामा कोरोना संक्रमण देखिएको हो। राष्ट्रिय जनस्वास्थ्य प्रयोगशाला टेकु र कोशी अस्पताल विराटनगरमा गरिएको परीक्षणमा सातजनामा संक्रमण पुष्टि भएको स्वास्थ्य तथा जनसंख्या मन्त्रालयले जनाएको छ।</p>
<p>स्वास्थ्य तथा जनसंख्या मन्त्रालयका सह-प्रवक्ता डा. समिरकुमार अधिकारीका अनुसार उदयपुरको भुल्केका १८, ४५ र ६५ वर्षका महिलामा संक्रमण पुष्‍टि भएको छ। त्यस्तै कपिलवस्तुका १७, १८ र १८ वर्षकै तीनजना पुरुषमा संक्रमण पुष्‍टि भएको मन्त्रालयले जनाएको छ।</p>
<p>यसैगरी, पर्साको वीरगञ्‍ज महानगरपालिका ३ छपकैयामा थप एकजना ६२ वर्षीय पुरुषमा आज संक्रमण पुष्‍टि भएको छ। </p>
<p>कपिलवस्तुमा अस्ति मात्रै दुईजनामा संक्रमण पुष्‍टि भएको थियो। भारतको मुम्बर्इबाट एक साताअघि लुकेर नेपाल प्रवेश गरेका दुईजनामा संक्रमण देखिएको थियो। </p>
<p>आज संक्रमण पुष्‍टि भएकाहरूको स्वास्थ्य अवस्था सामान्य रहेको र उनीहरूलाई अस्पताल लैजाने तयारी भइरहेको छ।</p>
<p>उदयपुरको भुल्के, पर्साको वीरगञ्‍जमा संक्रमितको संख्या धेरै देखिएपछि त्यहाँबाट ठूलो मात्रामा स्वाबको नमूना संकलन भएको थियो। संकलित नमूना परीक्षण गर्दा आज सातजनामा संक्रमण पुष्‍टि भएको हो।</p>
प्रतिक्रिया दिनुहोस्
.jpg)
