सैन्य अभ्यासका क्रममा बम हरायो, गाउँलेलाई जंगल जान रोक
<p>काठमाडौं। बाग्लुङको काठेखोला गाउँपालिका-५ घोडाबाँधेस्थित जंगलमा सैन्य अभ्यासको क्रममा बम हराएपछि गाउँलेलाई जंगल जान रोक लगाइएको छ।</p>
<p>१८ वैशाखमा नेपाली सेनाको अर्जुनवाण गण अन्तर्गत प्रशिक्षार्थीहरू सैन्य अभ्यास गर्ने क्रममा बम हराएको थियो।</p>
<p>बम नभेटिएपछि नेपाली सेनाले पत्र लेखेर सर्वसाधारणलाई जंगलमा जान नदिन अनुरोध गर्दै पत्र पठाएको गाउँपालिकाका अध्यक्ष अमरबहादुर थापाले देखापढीलाई बताए।</p>
<p>“बम हराएको भनेर पत्र आएसँगै हामीले गाउँलेलाई जंगल नजान सूचना गरेका छौं”, उनले भने, “बम कति शक्तिशाली हो भन्ने केही खुलाइएको छैन।”</p>
<p>गाउँपालिकालाई लेखेको पत्रमा सेनाले फायरिङको अभ्यास गराउने क्रममा एक थान बम हराएको उल्लेख गरेको छ।</p>
<p>बमको खोजि गर्न नेपाली सेनाले अहिले जंगलमा दैनिक बम खोजिरहेको छ।</p>
<p>बमको खोजी कार्य जारी रहेको गणका प्रमुख कर्नेल मिलनध्वज खाँणले बताए।</p>
<p>“तालिमका क्रममा हराएको हो। त्यति ठूलो विषय होइन”, उनले भने, “अहिले भेटि सकेको छैन। असुरक्षा नहोस भनेर हामीले पनि सबैलाई सूचना दिइरहेका छौं।”</p>
प्रतिक्रिया दिनुहोस्
.jpg)
