महामारी रोकथाम र उपचारका लागि आपतकालीन प्रतिकार्य योजना तयार
<p>काठमाडौं। सरकारले विश्‍वव्यापी महामारी बनेको कोभिड-१९ को प्रतिकार्यका लागि 'स्वास्थ्य क्षेत्रको आपतकालीन प्रतिकार्य योजना २०७७' स्वीकृत गरेको छ।</p>
<p>स्वास्थ्य तथा जनसंख्या मन्त्रालयका प्रवक्ता डा. विकास देवकोटाले आजको प्रेस ब्रिफिङमा यस योजनाले कोरोना भाइरस संक्रमणको जोखिम नियन्त्रण, उपचार तथा रोकथाममा सहयोग पुग्‍ने बताए।</p>
<p>"महामारीले नागरिकको स्वास्थ्यमा पार्ने असर न्यूनिकरण र यससँग जुध्‍न नीतिगत व्यवस्था गरेको छ", देवकोटाले भने, 'कोभिड-१९ को रोकथाम तथा उपचारका लागि स्रोतको पहिचान तथा परिचालनका लागि पनि यसले सहयोग पुग्‍नेछ।"</p>
<p>संक्रमित बढी देखिएको क्षेत्रमा 'मास टेष्‍ट' को लागि मन्त्रालय, विभाग, इपिडिमियोलोजी तथा रोग नियन्त्रण महाशाखा र नेपाली सेनाको संयुक्त टोली परीक्षणका लागि आवश्यक किट र उपकरणसहित परिचालन गरिएको मन्त्रालयले जनाएको छ।</p>
<p>स्वीस सरकारबाट हिजो प्राप्त ३० हजार थान किट देशका सबै ठाउँका प्रयोगशालामा पठाइसकिएकोले अब पीसीआर परीक्षण वृद्धि हुने प्रवक्ता देवकोटाले बताए।</p>
<p>हालसम्म देशभर पीसीआर प्रविधिबाट १५ हजार ४९२ र आरडीटी प्रविधिबाट ५४ हजार ५३१ जनाको कोभिड-१९ परीक्षण गरिएको छ।</p>
<p>पछिल्लो २४ घण्टामा ८५९ जनाको परीक्षण गरिएको छ।</p>
<p>आज भेरी अञ्चल अस्पतालमा गरिएको परीक्षणमा बाँकेको नेपालगञ्‍जमा १६ वर्षीय पुरुषमा पोजिटिभ देखिएको छ।</p>
<p>यो सहित नेपालमा कूल संक्रमित १०२ जना पुगेका छन्।</p>
<p>आज विराटनगरस्थित कोशी अस्पतालबाट ८ जनालाई डस्चार्ज गरिएको छ। योसँगै निको हुनेको संख्या ३० पुगेको छ।</p>
<p>देशभरका क्वारेन्टाइनमा १५ हजार ६२४ जना छन् भने संक्रमित र शंकास्पदसमेत गरी १३५ जना आइसोलेसनमा उपचाररत छन्।</p>
प्रतिक्रिया दिनुहोस्
.jpg)
