सांसद् अपहरण भनिएको घटनाको जाहेरी काठमाडौं प्रहरीमा, अनुसन्धान शुरू
<p>काठमाडौं। महानगरीय प्रहरी परिसर काठमाडौंले सांसद्‍द्वय महेश बस्नेत र किसान श्रेष्ठ तथा प्रहरीका पूर्वआईजीपी सर्वेन्द्र खनालविरुद्धको अपहरण तथा शरीर बन्धकसम्बन्धी मुद्दाको अनुसन्धान प्रक्रिया अघि बढाएको छ।</p>
<p>जिल्ला सरकारी वकिलको कार्यालय काठमाडौंले जाहेरी प्रहरी कार्यालयमा पठाएपछि महानगरीय प्रहरी परिसर काठमाडौंले अनुसन्धान शुरू गरेको हो।</p>
<p>परिसर प्रमुख एसएसपी श्यामप्रसाद ज्ञवालीले जिल्ला सरकारी वकिल कार्यालयमार्फत् जाहेरी निवेदन आएसँगै अनुसन्धान शुरू गरिएको जानकारी दिए।</p>
<p>जनता समाजवादी पार्टी (जसपा)का सांसद् डा. सुरेन्द्र यादवले जिल्ला सरकारी वकिलको कार्यालय, बबरमहलमा दिएको जाहेरी आज दिउँसो परिसर पठाइएको हो।</p>
<p>“जाहेरी आएपछि कानूनीरूपले हामीले गर्ने काम शुरू गरेका छौं”, एसएसपी ज्ञवालीले भने, “विस्तृत अनुसन्धान गर्छौं।”</p>
<p>प्रहरी स्रोतका अनुसार परिसरको अनुसन्धान टोली महोत्तरी प्रस्थान गरिसकेको छ।</p>
<p>यसअघि शुरूमा यादवसहितका नेताहरू जाहेरी दर्ता गर्न परिसर पुगेका थिए। तर, प्रहरीले घटना महोत्तरीमा भएकाले उतै जाहेरी दिन भनेको थियो।</p>
<p>सरकारी वकिलको कार्यालयले पनि शुरूमा जाहेरी दर्ता गरेको थिएन। यादवले जाहेरी राष्ट्रिय मानवअधिकार आयोगको कार्यालयमासमेत जाहेरी दिएका छन्।</p>
प्रतिक्रिया दिनुहोस्
.jpg)
