कानून दिवसमा प्रधानन्यायाधीशको शुभकामना- ‘महामारीसम्बन्धी छुट्टै विधिशास्त्रको आवश्यकता महशुस भयो’
<p>काठमाडौं। प्रधानन्यायाधीश चोलेन्द्र शमशेर जबराले कोभिड-१९ महामारीपछि ‘प्यान्डेमिक जस्टिस’ सम्बन्धी छुट्टै विधिशास्त्रको विकास गर्नुपर्ने आवश्यकता रहेको बताएका छन्। कानून दिवसको अवसरमा जारी गरेको शुभकामना सन्देशमा उनले त्यस्तो आवश्यकता औंल्याएका हुन्। २६ वैशाख २००९ मा ‘नेपाल प्रधान न्यायालय ऐन, २००८’ लागू भएको सम्झनामा प्रत्येक वर्ष २६ वैशाखलाई कानून दिवसको रूपमा मनाइँदै आइएको छ। </p>
<p>‘न्यायपालिकाको स्वतन्त्रता, विधिको शासन तथा आधुनिक न्याय प्रणालीको प्रारम्भ गर्ने दिशामा उक्त दिनमा कोरिएको मार्गचित्रलाई आजको अवस्थासम्म ल्याइपुर्‍याउन भूमिका निर्वाह गर्नुहुने सम्पूर्ण व्यक्तित्वहरूका योगदानको स्मरण गर्दै आजको यस विशेष दिनमा उहाँहरूप्रति हार्दिक सम्मानसमेत व्यक्त गर्दछु,’ आफ्नो सन्देशमा प्रधानन्यायाधीश राणाले भनेका छन्। </p>
<p>प्रधानन्यायाधीश राणाले न्यायिक इतिहासको अत्यन्त जटिल र कठिन परिस्थितिहरूमा पनि स्वतन्त्र न्यायपालिकाको मूल्य मान्यतालाई अक्षुण्ण राख्दै विधिको शासन तथा नागरिकका हक अधिकारको संरक्षणका लागि न्यायपालिकाले महत्त्वपूर्ण भूमिका खेलेको बताएका छन्। </p>
<p>साथै उनले नेपालको संविधानले प्रत्याभूत गरेको स्वतन्त्र, निष्पक्ष र सक्षम न्यायपालिका तथा विधिको शासनको सुनिश्चिततताका लागि आफू सँधै क्रियाशील रहने पनि प्रतिबद्धता व्यक्त गरेका छन्। </p>
<p>‘त्यसमा कहीँ कतैबाट कुनै किसिमको आँच आउन नदिन आफू सदैव सचेत, गम्भीर र संवेदनशील रहेको पनि म यस अवसरमा स्पष्ट गर्न चाहन्छु,’ उनले भनेका छन्, ‘आजको दिनमा हामी सबैले आ-आफ्नो तहबाट गर्नुपर्ने प्रण पनि त्यही नै हो।’</p>
प्रतिक्रिया दिनुहोस्
.jpg)
