सर्लाहीमा धान बोकेको भारतीय ट्रकबाट १८ लाख बरामद्
<p>सर्लाही। भारतबाट धान बोकेर आएको ट्रकलाई सर्लाही भन्सार चेकपोष्ट मलंगवामा जाँच गर्ने क्रममा १७ लाख ९० हजार नेपाली रूपैयाँ बरामद् भएको छ।</p>
<p>सशस्त्र प्रहरी बल नेपाल जिल्ला सुरक्षा बेस मलंगवाको टोलीले आज सर्लाही भन्सार चेकपोष्टमा भारतबाट नेपाल प्रवेश गरेको भारतीय ट्रक जाँच गर्ने क्रममा उक्त रकम बरामद् गरेको हो।</p>
<p>भारतको विहार राज्यको सीतामढी जिल्लाको मुजेलियाबाट धान बोकेर नेपाल भित्र्याउन लागिएको बीआर ३० जीए २४५८ नम्बरको भारतीय ट्रकबाट नेपाली रूपैयाँ बरामद् भएको सर्लाहीका सशस्त्र प्रहरी उपरीक्षक गङ्गाराम श्रेष्ठले जानकारी दिए।</p>
<p>उनका अनुसार ट्रकका चालक रामललित मण्डल र सहचालक नीरज कुमारलाई नियन्त्रणमा लिइएकाे छ। दुवैजना भारतीय नागरिक हुन्।</p>
<p>भारतबाट धान लिएर आएको ट्रक सर्लाहीको ईश्वरपुर नगरपालिकास्थित राईस मिलमा जान लागेकाे थियाे। बरामद् रकम हुुण्डी कारोबारीको हुुन सक्ने सशस्त्र प्रहरीको अनुमान छ।</p>
<p>बरामद् रकम सर्लाही भन्सार कार्यालय मलंगवमा आजै बुझाइएको सशस्त्र प्रहरी निरीक्षक सञ्जीतकुमार सिंहले जानकारी दिए। <em>रासस</em></p>
प्रतिक्रिया दिनुहोस्
.jpg)
