अमेरिकन आइडलको उत्कृष्ट १० मा पुगे दिवेश पोखरेल
<p>काठमाडौं। नेपालका दिवेश पोखरेल अमेरिकन आइडलको १८ औं सिजनको उत्कृष्‍ट १० मा पर्न सफल भएका छन्।</p>
<p>उत्कृष्‍ट २० जनाबाट धेरै भोट पाएर उनी उत्कृष्ट १० जनाभित्र पर्न सफल भएका हुन्।</p>
<p>हिजो पनि दिवेशले दमदार प्रस्तुति दिए। उनको प्रस्तुतिलाई निर्णायकले 'तिम्रो लजालुपन नै तिम्रो गोप्य हतियार' भएको संज्ञा दिएका थिए।</p>
<p>कोरोना भाइरसको संक्रमणको जोखिमका त्रासका कारण उनले घरबाटै प्रस्तुति दिएका थिए।</p>
<p>‘आर्थर गन’ को नामबाट अमेरिकन आइडलमा ख्याती कमाइरहेका दिवेश यसअघि उत्कृष्‍ट २० मा थिए।</p>
<p>उत्कृष्‍ट १० मा पुगेको खुशीमा दिवेशले सामाजिक सञ्जाल मार्फत् भोट गर्ने र सहयोग गर्ने सबैलाई धन्यवाद दिएका छन् ।</p>
<p>यसअघि नेपाली भाषामै भोट अपील गर्दै उनले भनेका थिए, ‘मेरो सांगीतिक यात्रामा साथ दिनुहुने सबैलाई धन्यवाद, अमेरिकन आइडलको टप २० पर्फमेन्स प्रिमियर हुँदैछ । यसमा अघि बढ्न मलाई हजुरहरूको भोटको आवश्यकता छ।'</p>
<p>उनलाई टेक्स्ट, वेभसाइटबाट र अमेरिकन आइडल एपबाट भोट गर्न सकिनेछ। यसका लागि एकजनाले ३० पटक भोट गर्न मिल्छ।</p>
<p>अमेरिकन आइडलको यो उचाइमा पुग्ने दिवेश पहिलो नेपाली गायक हुन्।</p>
<p>उनले अमेरिकन आइडलमा छानिनुअघि नै केही नेपाली गीत गाएर युट्युब मार्फत सार्वजनिक गरिसकेका थिए।</p>
<p>काठमाडौंमा हुर्किएका दिवेश उच्च शिक्षाका लागि अमेरिकामा आमा बुबासँगै बस्दैं आएका छन्।</p>
प्रतिक्रिया दिनुहोस्
.jpg)
