रोल्पामा भेटिएको बम डिस्पोज गर्न दाङबाट सेनाको टोली
<p>धनगढी। रोल्पाको त्रिवेणी गाउँपालिका-७ मा भेटिएको बम डिस्पोजल गर्न दाङबाट नेपाली सेनाको टोली आज विहान त्यसतर्फ गएको छ।</p>
<p>रोल्पामा डिस्पोजल सामग्री नभएपछि दाङको रिपुमर्दन गणबाट सेनाको टोली मगाइएको रोल्पाका प्रमुख जिल्ला अधिकारी लक्ष्‍मण ढकालले बताए। </p>
<p>उनका अनुसार हिजो साँझ दहबनाट सेनाको टोली बम रहेको स्थानमा पुगे पनि उपकरण नभएकाले डिस्पोज गराउन सकेन। सोही कारण दाङबाट टोली झिकाइएको प्रजिअ ढकालले जानकारी दिए।</p>
<p>आफू पनि बम रहेको स्थानतर्फ जान लागेको उनले बताए। दाङस्थित रिपुमर्दन गणबाट सेनानी निमेष पन्थीको कमान्डमा बम डिस्पोजल टोली रोल्पाका लागि गइरहेको छ।</p>
<p>हिजो साँझ बेवारिसे बम विस्फोट हुँदा बाख्रा गोठालो गएका चार बालबालिकाको मृत्यु भएको थियो। अहिले पनि घटनास्थलमा विस्फोटक पदार्थ रहेकाले डिस्पोज नगरी शव उठाउन सकिएको छैन। </p>
<p>घटनामा त्रिवेणी-७ का ११ वर्षीय विमला केसी, उनका पाँच वर्षीय भाइ विजय केसी, १४ वर्षीय नोखिराम डाँगी र त्रिवेणी-४ का १३ वर्षीय गौरव नेपालीको मृत्यु भएको छ। </p>
<p>घटनास्थल २०६२ सालमा तत्कालीन माओवादी र शाही नेपाली सेनाबीच भिडन्तस्थल रहेको खुलेको छ। त्यसलाई ‘दुम्ला भिडन्त’ भनेर चिन्‍ने गरिन्छ।</p>
प्रतिक्रिया दिनुहोस्
.jpg)
