नेपाली विद्यार्थीलाई अक्स्फोर्ड विश्वविद्यालयमा करिब ६० लाखको छात्रवृत्ति
<p>अबुधाबी। युनाइटेड अरब इमिरेट्सको अबुधाबी विश्‍वविद्यालयमा अध्ययनरत नेपाली युवा चिरन पाण्डेले अक्स्फोर्ड विश्‍वविद्यालयका लागि करिब ६० लाख रुपैयाँको प्रतिष्‍ठित छात्रवृत्ति पाएका छन्।</p>
<p>उनले एक लाख ८० दिरामको पूर्ण अनुदानसहितको इर्टेगन छात्रवृत्ति पाएका हुन्। एक हजार पाँच सय जनाभन्दा बढी आवेदकमध्येबाट १५ विद्यार्थीले उक्त छात्रवृत्ति पाएका छन्।</p>
<p>अक्स्फोर्डको छनोट समितिले संसारभरका उत्कृष्‍ट विद्यार्थीमध्येबाट उक्त छात्रवृत्तिका लागि चुन्‍ने गरेको छ। </p>
<p>पाण्डे न्युयोर्क युनिभर्सिटी अबुधाबीमा चार वर्षे पूर्ण अनुदानयुक्त छात्रवृत्तिमा अध्ययनरत छन्। आगामी सेप्‍टेम्बर अन्तिममा बेलायत प्रस्थान गर्ने उनले अक्स्फोर्ड विश्‍वविद्यालयबाट ‘वर्ल्ड लिटरेचर इन इंग्लिस’ विषयमा एकवर्षे स्‍नातकोत्तर गर्नेछन्।</p>
<p>‘मैले गत वर्षको अन्तिममा छात्रवृत्तिका लागि आवेदन दिएको थिएँ, २० फेब्रुअरीमा छनोट समितिले भिडिओ अन्तरवार्ता लिएको थियो,’ पाण्डेले दी नेशनलसँग भने, ‘अन्तरवार्ताकै दिन मेरो जन्मदिन परेको थियो।’</p>
<p>उनका अनुसार ६ मार्च अनौपचारिक इमेल पठाउँदै विश्‍वविद्यालयले उक्त छात्रवृत्ति जितेको जानकारी दिएको थियो। ‘त्यसलगत्तै नेपालमा रहेका बुवा-आमालाई फोन गरेर खुशी साटें,’ उनले भने, ‘उहाँहरू यो खुशीको खबर पाउने पहिलो हकदार हुनुहुन्थ्यो।’</p>
<p>न्युयोर्क युनिभर्सिटी अबुधाबीको १० वर्षे इतिहासकै पहिलोपटक २२ वर्षीय पाण्डेले उच्च प्रतिस्पर्धायुक्त छात्रवृत्ति पाएका थिए।</p>
<p>पाण्डेले पाएको छात्रवृत्ति परोपकार, शिक्षा र ब्रिटिश-अमेरिकन सांस्कृतिक सम्बन्धका क्षेत्रमा काम गर्दै थुप्रै प्रतिष्‍ठित सम्मान प्राप्त गरेकी मिका इर्टेगनको नाममा समर्पित छ। </p>
<p>पाण्डे काठमाडौंमा हुर्केका हुन्। र, काठमाडौंमै उनले उच्चमाविसम्मको अध्ययन गरेका थिए।</p>
प्रतिक्रिया दिनुहोस्
.jpg)
