चलचित्र विकास बोर्डको अध्यक्षका लागि आवेदन खुला
<p>काठमाडौं। चलचित्र विकास बोर्डको अध्यक्ष पदका लागि आवेदन खुला गरिएको छ। सञ्चार तथा सूचना प्रविधि मन्त्रालयले आज बोर्डको अध्यक्ष पदका लागि आवेदन आह्वान गरेको हो।</p>
<p>केशव भट्टराईको २९ मंसीर २०७६ मा निधन भएपछि अध्यक्ष पद खाली छ। </p>
<p>इच्छुक व्यक्तिले आजदेखि १५ दिनभित्र आवेदन दिनुपर्नेछ। बोर्ड अध्यक्ष हुनका लागि ३० वर्ष पूरा भएर ६५ वर्ष ननाघेको नागरिक हुनुपर्नेछ।</p>
<p>त्यस्तै कुनै पनि विषयमा स्नातक उत्तीर्ण गरेको र चलचित्र क्षेत्रमा १० वर्ष काम गरेको व्यक्तिले आवेदन दिन सक्ने मन्त्रालयले जनाएकाे छ। प्रविणता प्रमाणपत्र तह उत्तीर्ण गरेर चलचित्र क्षेत्रमा २० वर्ष बिताएका व्यक्तिले पनि आवेदन दिन पाउनेछन्।</p>
<p>लामो समयदेखि बोर्डको अध्यक्ष पद खाली हुँदा चलचित्रसम्बन्धी विभिन्न गतिविधि ठप्प छन्। आवेदन खुला भएसँगै अध्यक्ष पदका लागि निर्देशक दयाराम दाहाल, नायक भूवन केसीलगायतको नाम चर्चामा आउन थालेको छ।</p>
<p>यसअघि पनि उनीहरूसँगै राजेश हमाल, केपी पाठक, नवल नेपाललगायतलाई पनि दाबेदार मानिएका थिए। हमालले आफू राजनीतिक हस्तक्षेपबाट मुक्त भएर काम गर्न दिएको खण्डमा मात्र अध्यक्ष बन्ने बताउँदै आएका छन्।</p>
<p>कोभिड-१९ का कारण थला परेको नेपाली चलचित्र क्षेत्रलाई बलियो पार्ने चुनौती अबकाे अध्यक्षलाई हुनेछ।</p>
प्रतिक्रिया दिनुहोस्
.jpg)
