तनहुँमा जीप दुर्घटना हुँदा एकजनाको मृत्यु, ६ जना घाइते
<p>तनहुँ। तनहुँको घिरिङ गाउँपालिका-५, बेलभञ्ज्याङमा आज साँझ जीप दुर्घटना हुँदा एकजनाको मृत्यु भएको छ। ६ जना घाइते भएका छन्।</p>
<p>नवलपुरको डेढगाउँबाट पोखरातर्फ जाँदै गरेको ग १ ज ७५०२ नम्बरको जीप अनियन्त्रित भई सडकबाट २०० मिटर तल खस्दा नवलपुर वैदिक कालिका गाउँपालिका-२ की २३ वर्षीया सन्जु पोखरेलको मृत्यु भएको तनहुँ प्रहरीले जनाएकाे छ।</p>
<p>उनकाे पाेखरास्थित गण्डकी अस्पतालमा उपचारको क्रममा मृत्यु भएको जिल्ला प्रहरी कार्यालय तनहुँका प्रहरी नायव उपरीक्षक लीलाराज लामिछानेले जानकारी दिए।</p>
<p>दुर्घटनामा घाइते हुनेहरूमा नवलपुर बैदिककालिका गाउँपालिका-२ की ५४ वर्षीया दिलमाया खत्री, सोही ठाउँकी २६ वर्षीया सुनिता खत्री, ७ वर्षीय अभिषेक खत्री, ६ महीनाका अनिल खत्री, जीपका चालक ३१ वर्षीय चामबहादुर दमै र सहचालक २१ वर्षीय सन्तोष परियार छन्।</p>
<p>६ महीनाका बालक अनिलको आँखाको उपचारका लागि पोखरा जाँदै गरेको जीप अनियन्त्रित भई सडकबाट खसेको प्रहरीले जनाएको छ। घाइतेमध्ये दिलमायाको अवस्था गम्भीर रहेको र अन्यको अवस्था मध्यम रहेको प्रहरीकाे भनाइ छ। </p>
<p>गम्भीर घाइतेलाई थप उपचारका लागि पोखरा पठाइएको र अन्य घाइतेको भीमादस्थित शुभलक्ष्मी मेडिकल हलमा उपचार भइरहेको छ। <em>रासस</em></p>
प्रतिक्रिया दिनुहोस्
.jpg)
