पश्चिम नेपालमा वर्षा: सतर्कता अपनाउन आग्रह
<p>सुर्खेत। जल तथा मौसम कार्यालय कोहलपुर (हाल सुर्खेत) ले भेरी र कर्णाली नदी क्षेत्र आसपासका वस्तीहरूमा उच्च सतर्कता अपनाउन आग्रह गरेको छ।</p>
<p>सुदूरपश्चिम र कर्णाली प्रदेशका तल्लो क्षेत्र दैलेख, अछाम, सुर्खेत, जाजरकोट, कैलाली, डोटीलगायतका जिल्लामा भारी वर्षा हुन सक्ने अनुमान गरिएको छ।</p>
<p>आजदेखि पर्सि (१७ वैशाख) सम्म मौसमी प्रणाली सक्रिय रही मध्यमसम्म वर्षा हुन सक्ने अनुमान गरिएको छ।</p>
<p>कार्यालय प्रमुख विनोद पराजुलीले तीनै दिन हावाहुरी, चट्याङ र असिना वर्षासमेतको सम्भावना रहेको बताए। उनका अनुसार कार्यालयले चारवटा जिल्ला र आसपासका केही स-साना खोलानालाहरूमा आकस्मिक बहाव पनि हुन सक्ने भएकाले सतर्कता अपनाउन बबई, कर्णाली, महाकालीजस्ता ठूला नदी आसपासका नागरिकमा सूचना जारी गरेको छ।</p>
<p>हाल कर्णालीका सुर्खेत, दैलेखसहित आसपासका जिल्लाहरूमा मेघगर्जन, असिना र हावाहुरीसहित वर्षा भइरहेको छ।</p>
<p>त्यस्तै, जल तथा मौसम विज्ञान विभागको बाढी पूर्वानुमान महाशाखाले पनि आज, भोलि र पर्सि कर्णाली र सुदूरपश्चिम प्रदेशका विभिन्न नदीमा पानीको बहाव बढ्ने भएकाले सतर्कता अपनाउन आग्रह गरेको छ।</p>
<p>पश्चिमी र स्थानीय वायु तथा पूर्वी भू­-भाग नजिक बनेको न्यून चापीय क्षेत्रको प्रभाव हुनुको साथै बङ्गालको खाडी र अरब सागरबाट समेत जलवाष्पयुक्त हावा नेपाल प्रवेश भएकाले यसपटक वर्षा भइरहेको जल तथा मौसम विज्ञान विभागले जनाएको छ। <em>रासस</em></p>
प्रतिक्रिया दिनुहोस्
.jpg)
