भीटीएम किट आएपछि सप्तरीका थप तीन स्थानमा स्वाब संकलन हुँदै
<p>सप्तरी। स्वास्थ्य तथा जनसंख्या मन्त्रालयले भीटीएमसहित प्राविधिक स्वास्थ्यकर्मी पठाएपछि आज सप्तरीको जोखिमयुक्त तीन स्थानमा स्वाब संकलन हुने भएको छ।</p>
<p>भीटीएम आएपछि संक्रमित फेला पर्न सक्ने सम्भावित बोदे बर्साइन, सुरुङ्गा र सप्तकोशी नगरपालिकामा पीसीआर विधिबाट परीक्षण गर्न स्वाब सङ्कलन हुने भएको हो।</p>
<p>स्वास्थ्य मन्त्रालय स्वास्थ्य सेवा विभाग इपिडिमियोलोजी तथा रोग नियन्त्रण महाशाखाले ३२० भीटीएमसहित प्राविधिक स्वास्थ्यकर्मी सप्तरी पठाएको स्वास्थ्य कार्यालय सप्तरीले जनाएको छ।</p>
<p>महाशाखाका फणिन्द्र ज्ञवालीले बोदे बर्साइन-५ जाँजर, सुरुङ्गा नगरपालिका-११ अरहा भजक्का र सप्तकोशी नगरपालिका-१ फत्तेपुरमा केन्द्र स्थापना गरी स्वाब सङ्कलन गरिने बताए।</p>
<p>स्वाब संकलन गरी परीक्षणका लागि बीपी कोइराला स्वास्थ्य विज्ञान प्रतिष्ठान धरान पठाइने जनाइएको छ।</p>
<p>उदयपुरको त्रियुगा नगरपालिका-३, भुल्केमा फेला परेका संक्रमितहरू सप्तरीको कञ्चनरूप नगरपालिका–२ बरमझिया, वडा नं १२ चर्खिया र सप्तकोशी नगरपालिका–१, फत्तेपुरस्थित मस्जिदमा बसेर गएको पत्ता लागेपछि सो क्षेत्रमा तीव्ररूपमा आरडीटी गरिए पनि स्वाब परीक्षण हुन सकेको थिएन। <em>रासस</em></p>
प्रतिक्रिया दिनुहोस्
.jpg)
