रहेनन् 'प्रत्येक ठाउँ, प्रत्येक मान्छे'का सर्जक
<p>काठमाडौं। ‘प्रत्येक ठाउँ, प्रत्येक मान्छे’ का सर्जक पीटर जे. कार्थक अब हामीसँग रहेनन्।</p>
<p>लामो समयदेखि नेपाली साहित्यको सेवा गर्दै आएका कार्थकको आज बिहान ७७ वर्षको उमेरमा नेपाल क्यान्सर हस्पिटलमा निधन भएको उनको परिवारजनले बताएका छन्। </p>
<p>"१० दिनदेखि अस्पतालमा राखिएको भए पनि तीन दिनअघि घर लगिएको थियो। तर सास फेर्नै गाह्रो भएपछि हिजो ल्याइएको थियो। क्यान्सरको उपचार गर्दागर्दै हृदयाघातका कारण उहाँको निधन भयो," उनकी बुहारी भ्यालेन्टिना सुब्बाले फोनमा बताइन्।</p>
<p>कार्थकको घाँटीमा मासु पलाएपछि बायोप्सी गर्दा क्यान्सर भन्‍ने थाहा भएको थियो। तर, त्यो क्यान्सर उद्‍गम कहाँ भएको थियो भन्‍ने थाहा हुन नसकेको भ्यालेन्टिनाले बताइन्। उनका अनुसार भोलि कार्थकको अन्त्येष्टी हुनेछ। </p>
<p>भारतको सिलोङमा जन्मिएका कार्थकको प्रारम्भिक शिक्षादीक्षा दार्जिलिङमा भएको थियो। सन् १९६६ मा काठमाडौं आइपुगेका पिटरले १९७१ मा त्रिभुवन विश्वविद्यालयबाट अंग्रेजी साहित्यमा स्‍नातकोत्तर गरेका थिए। </p>
<p>‘प्रत्येक ठाउँ, प्रत्येक मान्छे’ उपन्यासबाट नेपाली साहित्यमा अविस्मरणीय स्थान बनाएका कार्थकको ‘पिटरका कथा’, ‘नेपाली म्युजिक मेकर्स’ र ‘काठमान्ड्रुइड्स’ प्रकाशित छन्।</p>
<p>नेपालमा अंग्रेजी भाषाको पत्रकारितामा पनि उनको उल्लेखनीय योगदान छ। सन् २००० मा ‘द हिमालयन टाइम्स’ शुरू हुँदा उनी संस्थापक सम्पादन समूहमा थिए। सन् २००२ देखि २००८ सम्म उनले ‘द काठमाडौं पोस्ट्’मा काम गरे। ‘रिपब्लिका’ दैनिकको प्रकाशनको शुरूदेखि सम्पादन समूहमा रहेका उनले सन् २०१५ सँग त्यहाँ काम गरे।</p>
प्रतिक्रिया दिनुहोस्
.jpg)
