‘बी डिभिजन’ लिगले निरन्तरता पाउला? पाए २०७७ को लिग के होला?
<p>काठमाडौं। कोभिड-१९ का कारण यतिबेला मुलुक लकडाउनमा छ। यसको असर सबै क्षेत्रमा परेको छ, खेलकुदमा नपर्ने त कुरै भएन। सामाजिक दूरी नै कोभिड-१९ जोखिम न्यूनीकरणको सबैभन्दा राम्रो उपाय मानिएको छ। त्यसैले सबभन्दा भीडभाड हुने क्षेत्र खेलकुदमा यसको असर झनै बढी छ। </p>
<p>सरकारले लकडाउनको घोषणा गर्नु एक साताअघि नै खेलकुदसँग सम्बन्धित गतिविधिमा तत्कालका लागि रोक लगाइएको थियो। खेलकुद गतिविधि स्थगन गर्ने निर्णय भइरहँदा नेपालमा शहीद स्मारक ‘बी’ डिभिजन लिग चलिरहको थियो। आधाआधी मात्र सकिएको लिग बीचमै स्थगित भएका कारण अब यसको भविष्‍य के हुन्छ भन्‍ने अन्योल कायम छ। </p>
<p>नेपालमा मात्र होइन, विश्‍वका अधिकांश देशमा बीचमा रोकिएका लिग के गर्ने भन्‍ने बहस जारी छ। यो सिजनलाई यत्तिकै टुंग्याउने कि पुनः शुरु गर्ने भन्‍नेमा अझै अन्योल छ। पुनः शुरु गर्दा कसरी गर्ने? बन्द रंगशालामा गर्ने की दर्शकसहितको रंगशालामा गर्ने? सबै विकल्प खुला छन् तर निष्‍कर्ष निस्किएको छैन। बहस जारी छ। यस्तै अन्योलमा यस वर्षको सी डिभिजन पनि परेको छ।</p>
<p>‘‘अहिलेको अवस्थामा केही भन्‍न सकिँदैन। अहिलेको जटिल परिस्थिति कहिलेसम्म लम्बिन्छ, त्यसमा भर पर्छ,’’ अखिल नेपाल फुटबल संघ (एन्फा) का महासचिव इन्द्रमान तुलाधरले भने। </p>
<p>एन्फाले ४ चैतदेखि सचिवालयसमेत बन्द हुने गरी सम्पूर्ण फुटबल गतिविधि स्थगन गरेको थियो। सोही दिन राष्‍ट्रिय खेलकुद परिषद् (राखेप) ले पनि फुटबल मात्र होइन, सम्पूर्ण खेलकुद गतिविधि स्थगन गर्ने निर्णय गर्यो। ११ चैतदेखि सरकारले लकडाउनको आदेश जारी गर्‍यो, जुन पछिल्लो पटक लम्ब्याएर १५ वैशाखसम्म पुर्‍याइएको छ। लकडाउनको अवधि लम्बिने सम्भावना उस्तै छ।</p>
<p>एन्फा लिग कमिटीका निर्देशक सञ्‍जीव मिश्र पनि अहिलेको अवस्थामा यही हुन्छ भनेर भन्‍न नसकिने बताउँछन्।</p>
<p>‘‘लामो समयम स्थगित भएको लिग पुनः सञ्‍चालन गर्न धेरै कुरामा ध्यान दिनुपर्छ। र यस्तो निर्णय लिग कमिटी आफैंले गर्न पनि सक्दैन। एन्फाले निर्णय गर्नुपर्छ,’’ मिश्रले भने, ‘‘अहिलेको अवस्था सामान्य हुनुपर्यो। एन्फाले पनि सरकारसँग अनुमति लिनुपर्छ। यो अवस्था कहिलेसम्म जान्छ भन्‍ने नै थाहा छैन। त्यसैले के गर्ने भन्‍ने अहिलेको अवस्थामा केही भन्‍न सकिँदैन।’’</p>
<p>‘बी’ डिभिजन लिगका ६३ मध्ये ३२ खेल सकिएका छन्। त्यसक्रममा चार टिमले ६-६ खेल खेलेका छन् भने बाँकी आठ टिमले ५-५ खेल मात्र। सातदोबाटो युथ क्लब १५ अंकका साथ शीर्ष स्थानमा छ भने खुमलटार १३ अंकका साथ दोस्रो र बाँसबारी क्लब ११ अंकका साथ तेस्रो स्थानमा छ। </p>
<p>गत सिजन नेपालका सबै लिगमा रेलिगेसनको प्रावधान थिएन। त्यसैले कुनै पनि टिम घटुवा वा बढुवा हुने भएनन्। यसपटक भने एन्फाले एक टिम घटुवा बढुवा हुने प्रावधान राखेको छ। ‘ए’ डिभिजन लिगबाट सरस्वती युथ क्लब रेलिगेसनमा परिसकेको छ। बी डिभिजन लिगबाट पनि एउटा क्लब ‘ए’ डिभिजन लिगमा बढुवा हुनेछ भने एक टिम ‘सी’ डिभिजन लिगमा झर्नेछ। </p>
<p>सबै टिमले बराबर खेल नखेलेका तथा लिगमा आधाभन्दा धेरै खेल बाँकी रहेका कारण बेल्जियममा जस्तो शीर्ष स्थानमा रहेको क्लबलाई विजेता घोषणा गर्न पनि नमिल्ने क्लबका पदाधिकारीहरू बताउँछन्। बाँसबारी क्लबका अध्यक्ष मधुसुदन उपाध्याय पनि ढिला गरेर भए पनि लिग सम्पन्‍न गर्नुपर्नेमा जोड दिन्छन्।</p>
<p>‘‘यो संक्रमणकालको अवस्था हो। ढिला भए पनि लिग त सक्नै पर्छ,’’ उपाध्यायले भने, ‘‘एएफसीले पनि अहिले रोकिएका खेलहरूलाई सामान्य अवस्था भएपछि पुनः सञ्‍चालन गर्ने भनेको छ। त्यही गाइडलाइन मान्‍ने हो भने पनि हामीले लिग सक्नैपर्छ। यसमा विवाद हुन्छजस्तो मलाई लाग्दैन। बरू ०७७ मा लिग नगर्दा पनि हुन्छ।’’ </p>
<p>यसअघि २०६६ सालमा पनि ‘ए’ डिभिजन लिग २०६७ मा सकिएको थियो। यसपटक पनि लिगको सिजन २०७६-०७७ को हुने सम्भावना बढेको छ। ‘ए’ डिभिजन लिग समाप्त भए पनि ‘बी’ र ‘सी’ डिभिजन लिग सकिएका छैनन्। त्यसैले आगामी सिजन (२०७७) मा यही सिजनले निरन्तरता पाउने सम्भावना बढेको छ। </p>
<p>‘‘यही अवस्था कहिलेसम्म जान्छ भन्‍ने थाहा छैन। सरकारले खेल सञ्‍चालन गर्न अनुमति दिए पनि लामो समयको अन्तरालका कारण हामीले क्लबहरूलाई तयारी गर्ने समय दिनुपर्छ,’’ लिग निर्देशक मिश्रले भने, ‘‘लामो समयपछि एक्कासी खेल्दा खेलाडी इन्जुरी हुने सम्भावना हुन्छ। त्यसैले समय त लाग्छ नै।’’</p>
प्रतिक्रिया दिनुहोस्
.jpg)
