प्रशिक्षक सेटिनले भने- ‘क्लबको विवादले मेस्सीको भविष्यमा कुनै असर पर्दैन’
<p>काठमाडौं। प्रशिक्षक क्वेक सेटिनले बार्सिलोनाको बोर्डमा भएको विवादले मेस्सीको भविष्यमा कुनै फरक नपर्ने बताएका छन्।</p>
<p>ला लिगा साविक विजेताको मुख्य प्रशिक्षक सेटिनले क्याम्प नोउमा पर्दा पछाडि जति किचलो भए पनि बार्सिलोनामा मेस्सीको भविष्यमा कुनै असर नपर्ने बताएका छन्।</p>
<p>कोभिड-१९ महामारीका कारण ला लिगा स्थगित भएको छ। तर, बार्सिलोनाको आन्तरिक किचलोलाई भने यसले रोकेको छैन। गत साता झन बार्सिलोनाको विवाद सतहमा आएको थियो।</p>
<p>बार्सिलोनाका अध्यक्ष जोसेप मारिया बाटोमेउलाई दबाब दिनका लागि बोर्डका ६ सदस्यले राजीनामा दिएका थिए। लगत्तै क्लबका अध्यक्षले उपाध्यक्ष इमिली रोउसाउडलाई कारबाही गर्ने जनाएका छन्। उनले बार्सिलोनामा आर्थिक अनियमितता भएको भन्ने आरोपको कडा प्रतिवाद गरेका छन्।</p>
<p>बाेर्ड सदस्यबाट राजीनामा दिनेमा क्लबको चार उपाध्यक्षमध्येका दुई इमिली रोउसाउड र इनरिके टोमबसका साथै चार निर्देशक सिल्भो इलियास, जोसेप पोन्ट, जोर्डी काल्सामिग्लिया र मारिया टेइजिडोर छन्।</p>
<p>अध्यक्ष पदका सम्भावित उम्मेद्वार भिक्टोर फोन्टले पनि बार्टोमेउ माथि निशाना गर्दै क्लब ‘नैतिक पतन’ तथा ‘आर्थिक संकट’मा जान सक्ने बताएका थिए।</p>
<p>इर्नेष्टो भाल्भार्डेलाई बर्खास्त गरेपछि खेलकुद निर्देशक इरिक एबिडलले टीमको आलोचना गरेका थिए। त्यसको मेस्सीले प्रतिवाद गरेपछि उनी पनि विवादमा मुछिएका थिए। कोभिड-१९ महामारीमा खेलाडीको तलब कटौती गर्ने क्रममा पनि बोर्डले कुनै समन्वय नगरेकोमा पनि मेस्सीले निराशा व्यक्त गरेका थिए।</p>
<p>मेस्सी म्यानचेस्टर सिटी र इन्टर मिलानसँग जाेडिएको चर्चा बाहिरिएको अवस्थामा मुख्य प्रशिक्षक सेटिनले उनी क्लबमै रहने र कप्तान कै भूमिकामा रहने बताएका हुन्।</p>
<p>‘‘ठूलो क्लबमा यस्ता कुरा सामान्य हो। यस्तो विपतको घडीमा विवादका कुरा बाहिर आउनु दुखद् हो’’, टिभी ३ सँगको कुरामा सेटिनले भने, ‘‘मलाई शान्त वातावरणमा काम गर्न राम्रो लाग्छ। तर अवस्था यस्तो छ। मलाई लाग्दैन की यस्तो विवादले मेस्सीजस्तो खेलाडीको भविष्यमा कुनै फरक पर्छ। म विश्वस्त छु मेस्सीले क्याम्प नोउमै आफ्नो करियर अन्त्य गर्नेछन्।’’</p>
<p>यस सिजन ला लिगा अन्त्य हुनुभन्दा अगाडि सेटिनको बार्सिलोना चीर प्रतिद्वन्द्वी रियाल मड्रिडभन्दा दुई अंकले माथि छ। लिगमा अझै ९ खेल बाँकी छ। यत्तिकै सिजन अन्त्य भयो भने शीर्ष क्लबको हैसियतमा बार्सिलोना विजेता बन्ने सम्भावना हुन्छ।</p>
<p>‘‘सबै खेल खेलेरै लिग जित्न चाहन्छु’’, बार्सिलोनाका प्रशिक्षक सेटिनले भने, ‘‘लिग सकिएन भने के हुन्छ म भन्न सक्दिनँ। हामीले उपाधि पायौं भने पनि मलाई त्यसले पूर्ण सन्तुष्टि दिने छैन।’’</p>
प्रतिक्रिया दिनुहोस्
.jpg)
