सेती अस्पतालमा प्रसूतिको आकस्मिक सेवा मात्र खुला
<p>कैलाली। आजदेखि अनिश्‍चितकालका लागि प्रसूति सेवा बन्द गरेको सेती प्रादेशिक अस्पतालले आकस्मिक सेवा भने खुला राखेको छ। </p>
<p>अस्पतालको प्रसूति विभाग प्रमुख यशोदा ढकालले अस्पताल प्रशासनको निर्देशनअनुसार प्रसूति वार्डमा आकस्मिक सेवा खुलै राखिएको बताइन्। </p>
<p>आकस्मिक डेलिभरी सेवा र शल्यक्रिया मात्र गरिने बताउँदै उनले प्रसूतिको नियमित जाँच भने नहुने जानकारी दिइन्।</p>
<p>अस्पतालले मंगलबार सूचना जारी गर्दै प्रसूति सेवा बन्द हुने जानकारी दिएको थियो। प्रदेश सरकारले सेती अस्पताललाई कोरोना विशेष अस्पताल घोषणा गरिसकेको र संक्रमितको उपचारका लागि थप शय्या आवश्‍यक रहेकाले प्रसूति सेवा बन्द गरिएको अस्पतालद्वारा जारी सूचनामा जनाइएको थियो।</p>
<p>उक्त अवधिमा आमा सुरक्षा कार्यक्रम लागू भएको धनगढीकै निजी अस्पताल नवजीवनबाट सेवा लिनसमेत आग्रह गरिएको थियो। तर नवजीवन अस्पताल सञ्‍चालक समितिका सदस्य डाक्टर निरज अर्यालले हिजै पर्याप्त पूर्वाधार र जनशक्ति कमिका कारण चाप थेग्‍न नसकिने बताइसकेका छन्।</p>
<p>सामाजिक सञ्‍जालमा भने सेती प्रादेशिक अस्पतालबाट प्रसूति सेवा निजी अस्पतालमा लैजाने कुराको व्यापक विरोध भइरहेको छ। बरु कोरोना विशेष अस्पताल अन्यत्र बनाएर सेती अस्पताललाई नियमित उपचार गर्ने अस्पताल नै राख्नुपर्ने धारणा सामाजिक सञ्‍जालमा आइरहेका छन्।</p>
प्रतिक्रिया दिनुहोस्
.jpg)
