महाभारत वन क्षेत्रमा भेटियो पाटेबाघ
<p>काठमाडौं। समुद्री सतहदेखि दुई हजार पाँच सय मिटरको उचाइमा अवस्थित महाभारत वन क्षेत्रमा पाटेबाघ (रोयल बंगाल टाइगर) देखिएको छ।</p>
<p>नेपालको वन र वन्यजन्तु संरक्षणको क्षेत्रको यो पहिलो घटना भएको दाबी संरक्षणकर्मीहरूको छ।</p>
<p>जिल्ला वन कार्यालय डडेल्धुरा अन्तर्गत पर्ने भागेश्‍वर करिडोर क्षेत्रमा पाटेबाघ फेला परेको डिभिजन वन अधिकृत विष्णुप्रसाद आचार्यले जानकारी दिए।</p>
<p>“वन विभाग, विश्‍व वन्यजन्तु कोष (डब्लुडब्लुएफ) संरक्षणकर्मीहरूसँग भेरिफाइ गर्दा नेपालको त्यति उचाइमा पाटेबाघ भेटिएको पहिलो घटना भएको पुष्‍टी भएको छ,” उनले भने ।</p>
<p>६ मार्चदेखि ६ अप्रिलसम्म महाभारत वन क्षेत्रमा वन्यजन्तुको अध्ययन गर्ने क्रममा पाटेबाघ क्यामेरा ट्रयापिङमा परेको हो।</p>
<p>तराई भूपरिधि कार्यक्रम, विश्‍ववन्यजन्तु कोष नेपालको आर्थिक एवं प्राविधिक सहयोग र डिभिजन वन कार्यालय डडेल्धुराले संयुक्त रूपमा पाटेबाघको उपस्थितिलाई समेत यकिन गर्न ३२ जोडी क्यामेरा राखिएको थियो। त्यसअघि गाउँलेहरूले यस क्षेत्रमा पाटेबाघ देखिने गरेको सूचना दिएका थिए ।</p>
<p>“एक स्थानमा उक्त बाघ क्यामेरामा ट्रयाप भएको हो। त्यस्तै रेड फक्स, चितुवा, घोरल, लार्ज इन्डिएन सिभेट, लिओपार्ड क्याट, दुम्सी, मृगका प्रजाति र चरा लगायतको तस्वीर कैद भएको छ,” डिभिजन वन अधिकृत आचार्यले भने, “यो यस क्षेत्रको वन र वन्यजन्तु संरक्षणका लागि पनि सुखद कुरा हो।”</p>
<p>यसबाट पाटेबाघको क्षेत्रमा अध्ययन गर्ने नयाँ ढोका खुलेको उनको भनाइ छ। उक्त बाघ त्यहाँकै रैथाने हो वा अन्यत्रबाट आहाराको खोजीमा आइपुगेको हो भन्‍ने विस्तृत अध्ययन हुन बाँकी रहेको वन कार्यालयले जनाएको छ।</p>
प्रतिक्रिया दिनुहोस्
.jpg)
