खेलाडी र प्रशिक्षकलाई अनलाइन मनोवैज्ञानिक कक्षा
<p>काठमाडाैं। नेपाल ओलम्पिक कमिटीले आज टोकियो ओलम्पिकको छनोट खेल खेल्ने, वाइल्ड कार्डका लागि तयारी गरेका र छात्रवृत्ति पाएका खेलाडी, प्रशिक्षक तथा संघसँग भिडिओ कन्फ्रेन्स गरेको छ।</p>
<p>लकडाउनमा खेलाडी, प्रशिक्षकको अवस्था बुझ्न र उनीहरूलाई केही समस्या परेको भएको सामाधानसमेत गर्ने उद्देश्यले भिडिओ कन्फ्रेन्स गरिएको हो। </p>
<p>कोभिड-१९ का कारण ११ चैतदेखि लकडाउन भएकाले खेलाडी घरभित्रै हुँदा उनीहरूलाई मानसिक, शारीरिकरूपमा तन्दुरुस्त राख्न विभिन्न चरणमा भिडिओ कन्फ्रेन्समार्फत् छलफल गरिएको छ।</p>
<p>छलफलपछि पोषणविद्सँग नियमित सम्पर्क गराएर खेलाडीको खेलअनुसारको डाइट दिनेलगायतको कार्य हुनेछ भने कमिटीले बनाएको डाक्टरको समूहले अनुगमन गर्नेछन्।</p>
<p>कमिटीले ३० चैतबाट खेलाडी तथा प्रशिक्षकका लागि मनोवैज्ञानिक कक्षा अनलाइनमार्फत् सञ्चालन गर्नेछ। छलफलमा सहभागी खेलाडी प्रशिक्षकले एनओसीले अप्ठ्यारो परिस्थितिमा अभिभावकत्व ग्रहण गरेको भन्दै खुशी व्यक्त गरेका थिए।</p>
<p>कमिटीका अध्यक्ष तथा सांसद जीवनराम श्रेष्ठले ओलम्पिक २०२१ को २३ जुलाईदेखि ८ अगस्टसम्म हुने भएकाले यसलाई अवसरका रूपमा लिनका लागि आजैबाट परिस्थितिलाई बुझेर काम गर्नुपर्ने बताए।</p>
<p>ओलम्पिकका लागि ५ जुलाईसम्म अन्तिम ‘इन्ट्री’को समय छ। सो छलफलमा राष्ट्रिय खेलकूद परिषद्का उपाध्यक्ष पीताम्बर तिम्सिनाले १३औँ दक्षिण एशियाली खेलकुदमा पदक जितेका खेलाडीका लागि घोषणा गरिएको पुरस्कार राशि उपलब्ध गराउन थालिएको जानकारी गराए।</p>
<p>ओलम्पियन दीपक विष्टले खेलाडीले जस्तो परिस्थितिमा पनि अभ्यास गर्न सक्नुपर्ने विचार व्यक्त गर्दै खेलाडीले घरमै बसेर अभ्यास गरिरहेको र सामाजिक दायित्व पूरा गर्ने कामसमेत भइरहेको जानकारी गराए।</p>
<p>छलफलमा कीर्तिमानी पौडी खेलाडी गौरिका सिंहले प्रशिक्षकसँग अनलाइनमार्फत् छलफल गरेर घरभित्रै अभ्यास गरिरहेको बताइन्। डा. सरोजकृष्ण श्रेष्ठले घरभित्रै बस्ने र केही समस्या भएर डाक्टरसँग परामर्श लिन आग्रह गरे। <em>रासस</em></p>
प्रतिक्रिया दिनुहोस्
.jpg)
