ससुराकाे बञ्चराे प्रहारबाट बुहारी गम्भीर घाइते
<p>रूपन्देही। कञ्चन गाउँपालिकामा ससुराले आफ्नै बुहारीमाथि बञ्चरो प्रहार गरेका छन्।</p>
<p>कञ्चन-३, धौलागिरि चोकका ५४ वर्षीय चन्द्रमणि पौडेलले छोराबुहारी २८ वर्षीया लीलामाथि बञ्चरो प्रहार गरी घाइते बनाएका हुन्। </p>
<p>घरको भान्साकोठा सफा गरिरहेका समयमा पौडेलले एक्कासि हानेको बञ्चराे प्रहारबाट गम्भीर घाइते भएकी लीलाको मेडिकल कलेज भैरहवामा उपचार भइरहेको इलाका प्रहरी कार्यालय रुद्रपुरका प्रहरी निरीक्षक इन्द्रप्रसाद चौधरीले जानकारी दिए। लीलाको टाउकामा गहिरो चोट लागेका कारण स्वास्थ्यावस्था गम्भीर रहेको बताइएको छ।</p>
<p>लामो समयदेखि रुद्रपुरमा मणि किराना पसल सञ्चालन गर्दै आएका चन्द्रमणिले आफ्नी बुहारीलाई बन्चराेले हानेपछि कान्छीआमाका घरमा जान्छु भन्दै हिँडेका बेला बाटाेबाटै स्थानीयवासीले नियन्त्रणमा लिएर इलाका प्रहरी कार्यालय रुद्रपुरको जिम्मा लगाएका थिए। </p>
<p>पौडेलले बुहारीमाथि पटक-पटक दुर्व्यवहार गर्दै आएको छिमेकी बताउँछन्। “लीलाका श्रीमान् कोठामा भएको बेला बाहिरबाट ढोकाको चुकुल लगाई चन्द्रमणिले भान्सामा गएर लीलालाई बञ्चरोले हिर्काएछन्। हामीले थाहा पाएर जाँदा उनी रगताम्य भएर भूइँमा ढलेकी थिइन्। हतारहतार अस्पताल पुर्‍यायौँ, अहिलेसम्म होस आएको छैन”, छिमेकी पुष्प शर्माले भनिन्।</p>
<p>घटनापछि लीलाका श्रीमान तीलकरामले आफ्ना बुबाविरुद्ध ज्यान मार्ने उद्योगअन्तर्गत इलाका प्रहरी कार्यालय सालझण्डीमा जाहेरी दर्ता गरेकाे प्रहरी निरीक्षक कमल परियारले बताए। “पारिवारिक बेमेलका कारण घटना भएको देखिन्छ, हामी अनुसन्धान गर्दैछौँ”, उनले भने। <em>रासस</em></p>
प्रतिक्रिया दिनुहोस्
.jpg)
