पूर्वडीआइजी भन्छन्- 'प्रहरीको कार्यकारी भूमिकामा गृह मन्त्रालय हावी भो'
<p>काठमाडौं। पूर्वप्रहरी नायब महानिरीक्षक (डीआईजी) हेमन्त मल्ल ठकुरीले नेपाल प्रहरीको कार्यकारी भूमिकामा गृह मन्त्रालय हावी भएको र त्यसले प्रहरीको कामकारवाहीमै दूरगामी असर पर्ने बताएका छन्।</p>
<p>सुरक्षा र प्रहरीसम्बन्धी विषयमा आफ्नो धारणा सार्वजनिक गरिरहने मल्लले आज ट्विटरमार्फत् यस्तो टिप्पणी गरेका हुन्। प्रहरीमा पछिल्लो समय डीआईजीको दरबन्दी कटौतीसम्बन्धी विषयले ठूलो तरंग ल्याएको छ।</p>
<p>गृह मन्त्रालयले एकाएक ठूलो संख्यामा डीआईजीको दरबन्दी कटौती गर्ने प्रस्ताव मन्त्रिपरिषदमा पुर्‍याएपछि प्रहरीको ठूलो पंक्ति असन्तुष्ट हुन पुगेको छ।</p>
<p>"प्रहरी प्रधान कार्यालयलाई संवैधानिक भूमिकामा धकेल्दै जाने र गृह कार्यकारी भूमिकामा हावी हुँदै जाने हो भने," उनले लेखेका छन्, "प्रहरीको कामकारवाहीमा समेत दूरगामी असर पार्नेछ।"</p>
<p>पूर्वडीआईजी ठकुरीले प्रहरीमा भइरहेको दरबन्दी कटौती पनि अनुचित भएको टिप्पणी गरेका छन्। उनले लेखेका छन्, "प्रहरीमा भइराखेको डाउन साइजिङ होइन, यो त रङ साइजिङ भइराखेको छ।"</p>
प्रतिक्रिया दिनुहोस्
.jpg)
