मुलर थप दुई वर्ष बायर्नमा रहने
<p>काठमाडौं। बायर्न म्युनिखका फरवार्ड थोमस मुलरले क्लबसँग दुई वर्षका लागि नयाँ सम्झाैता गरेका छन्। अब उनी २०२३ सम्म बायर्न मै बस्नेछन्।</p>
<p>३० वर्षे जर्मनीका फरवार्ड मुलरले बायर्नबाट ५०० भन्दा धेरै खेल खेलिसकेका छन्। २००९ मा बायर्नबाट डेब्यू गरेका मुलरले क्लबबाट १६ वट उपाधि जितेका छन्।</p>
<p>‘‘यो क्लब मेरो लागि पुरानो रोजगारदाता मात्र होइन। यसमा मेरो छुट्टै लगाव छ’’, बुन्डेसलिगामा ११६ गोल गरिसकेका मुलरले भने, ‘‘यही क्लबमा थप दुई वर्ष बिताउन पाउँदा म खुशी छु। मैदानमा पनि म आफ्नो तर्फबाट सक्दो राम्रो गर्ने प्रयास गर्नेछु।’’</p>
<p>कोरोना भाइरस संक्रमणका कारण जर्मन बुन्डेसलिगा रोकिनुअघि बायर्न स्पष्ट चार अंकको अग्रतासहित शीर्ष स्थानमा छ। महामारीका कारण बुन्डेसलिगा ३० अप्रिलसम्मका लागि स्थगित छ।</p>
<p>‘‘लिग पुनःसञ्चालन भयो भने हामीले फेरि सफलता हासिल गर्नेमा म विश्वस्त छु’’, मुलरले भने। बायर्नका खेलाडी यही सातादेखि पाँच/पाँचजनाको समूहमा ट्रेनिङ गरिरहेको <em>बीबीसी</em>ले जनाएको छ।</p>
प्रतिक्रिया दिनुहोस्
.jpg)
