Health and Lifestyle

गृहपृष्ठ

कोरोना सङ्क्रमणबाट काभ्रेमा पत्रकारसहित दुईको मृत्यु काभ्रेपलाञ्चोक। कोरोना भाइरस सङ्क्रमणका कारण आज काभ्रेपलाञ्चोकमा एक पत्रकारसहित दुई पुरुषको मृत्यु भएको छ। मृत्यु हुनेमा चौँरीदेउराली गाउँपालिका-५ निवासी ५१ वर्षीय पत्रकार विष्णुप्रसाद चौलागाई र बनेपा नगरपालिकाका ३९ वर्षीय एक पुरुष छन्। मृतक चौंलागाई काभ्रे पोष्ट साप्ताहिकको प्रधानसम्पादक थिए। उनको काठमाडौंको चाबहिलस्थित ओम अस्पतालमा उपचारका क्रममा आज बिहान ४ बजे मृत्यु भएको हो। चौलागाईलाई गत असोज २६ गते कोरोना सङ्क्रमण पुष्टि भएको थियो। त्यसपछि होम आइसोलेसनमा बसेका चौलागाईलाई ज्वरो बढेपछि कात्तिक १ गते ओम अस्पताल भर्ना गरिएको मृतकका भाइ दिपकले बताए। दुई दशकभन्दा बढी काभ्रेपलाञ्चोकमा पत्रकारितामा सक्रिय चौलागाईको पत्नी, एक छोरा र एक छोरी छन्। पारिवारिक सोतका अनुसार ‘ब्रोन्काइटिस्’ रोगपीडित चौलागाईमा कोरोना सङ्क्रमण देखिए पनि हप्ता दिनअघि सङ्क्रमण रिपोर्ट नेगेटिभ आएको थियो। कोरोना सङ्क्रमणका कारण ‘मल्टी अर्ग्यान फेलिएर’ भई पत्रकार चौलागाईको निधन भएको कोभिड-१९ रोकथाम तथा नियन्त्रण कमाण्ड पोष्टका सदस्यसचिव एवं जिल्ला स्वास्थ्य कार्यालय प्रमुख डा. नरेन्द्र झाले बताए। “चौलागाईको रिपोर्ट नेगेटिभबारे जानकारी छैन तर उहाँको निधन कोरोना सङ्क्रमणका कारण भएको हो,” उनले भने। हालसम्म काभ्रेपलाञ्चोकमा १४ पुरुष र सात महिला गरी २१ को कोरोना सङ्क्रमणका कारण मृत्यु भएको कमाण्ड पोष्टले जनाएको छ। पोष्टका अनुसार विगत २४ घण्टामा २८ पुरुष र १६ महिला गरी ४४ नयाँ कोरोना सङ्क्रमित थपिएका हुन्। आज पाँच सङ्क्रमित कोरोनामुक्त भई घर फर्किएका छन्। यसैबीच, काभ्रेपलाञ्चोकमा हालसम्म कुल सङ्क्रमितको सङ्ख्या एक हजार ६०६ पुगेको छ। यसमध्ये ६७ प्रतिशत अर्थात् एक हजार १०३ कोरोनामुक्त भइसकेको पोष्टले जनाएको छ। हाल कोरोना सक्रिय सङ्क्रमितमध्ये ४५ प्रतिशत अर्थात् २१६ बनेपा नगरका हुन्। धुलिखेल नगरमा ९५, पनौतीमा ८९, पाँचखालमा १९, नमोबुद्धमा २७, मण्डनदेउपुरमा २२ तथा भुम्लु गाउँपालिकामा एक, रोशीमा छ, बेथानचोकमा चार, खानीखोलामा एक सङ्क्रमित रहेका छन्। यहाँका दुई स्थानीय तह चौंरीदेउराली र महाभारत गाउँपालिका कोरोनामुक्त छन्। हाल सक्रिय सङ्क्रमितमध्ये अस्पताल आइसोलेसनमा ९० र होम आइसोलेसनमा ३९२ उपचाररत रहेको पोष्टले जनाएको छ। रासस

प्रतिक्रिया दिनुहोस्