झापा र सप्तरीमा थप दुई सङ्क्रमितको मृत्यु
<p>झापा। कोरोना भाइरस सङ्क्रमणबाट झापा, दमकका एकजना पुरुषको मृत्यु भएको छ।</p>
<p>दमक नगरपालिका-९ का ५२ वर्षीय सङ्क्रमित पुरुषको धरानस्थित विपी कोइराला स्वास्थ्य विज्ञान प्रतिष्ठान उपचारका क्रममा मृत्यु भएको हो।</p>
<p>गत असोज १८ गते अस्पताल भर्नासँगै सङ्क्रमण देखिएका उनको दिउँसो उपचारका क्रममा मृत्यु भएको प्रतिष्ठानका सहप्रवक्ता डा .आशिष श्रेष्ठले जानकारी दिए।</p>
<p>यससँगै दमकमा कोरोना सङ्क्रमणबाट मृत्यु हुनेको सङ्ख्या तीन र जिल्लामा १२ पुगेको छ।</p>
<p>दमकमा एक महिला र दुई सङ्क्रमित पुरुषको मृत्यु भएको छ।</p>
<p>यस्तै सप्तरीमा कोरोना सङ्क्रमणबाट बिहीबार साँझ थप एक वृद्धको मृत्यु भएको पुष्टि भएको छ।</p>
<p>मृत्यु हुनेमा जिल्लाको डाकनेश्वरी नगरपालिका–४ निवासी ६७ वर्षीय वृद्धका रहेको जिल्ला स्वास्थय कार्यालयका प्रमुख दुनियालाल यादवले जानकारी दिए।</p>
<p>उपचारका लागि धरानतर्फ पठाउने क्रममा ६७ वर्षीय वृद्धको मृत्यु भएको जिल्ला स्वास्थ्य कार्यालयले जनाएको छ।</p>
<p>स्वास्थ्य प्रमुख यादवका अनुसार चार-पाँच दिनअघि ज्वरो आएपछि उनी गजेन्द्रनारायण सिंह अस्पताल राजविराजमा भर्ना भएका थिए।</p>
<p>सोही क्रममा एक दिन अगाडि स्वाब परीक्षण गर्दा उनमा सङ्क्रमण भेटिएपछि होमआइसोलेसन रहेका उनको थप उपचारका लागि लगिने क्रममा मृत्यु भएको जिल्ला स्वास्थ्य कार्यालयका प्रमुख यादवले बताए। </p>
<p>होम आइसोलेसनमा उनको स्वास्थ्य अवस्था गम्भीर भएपछि थप उपचारका लागि धरानस्थित बिपी कोइराला स्वास्थ्य विज्ञान प्रतिष्ठान लैजाँदै गर्दा मृत्यु भएको स्वास्थ्य कार्यालयले जनाएको छ।</p>
<p>मृतक निमोनिया रोगले ग्रसित रहेको जनाइएको छ।</p>
<p>यससँगै सप्तरीमा कोरोनाबाट मृत्यु हुनेको सङ्ख्या १८ पुगेको स्वास्थ्य कार्यालय प्रमुख यादवले जानकारी दिए।</p>
<p>यस्तै हालसम्म सप्तरीमा एक हजार ३५७ जनामा कोरोना सङ्क्रमण देखिएको छ। सङ्क्रमितमध्ये एक हजार ९६ निको भएर घर फर्किएका छन्। <em>रासस</em></p>
प्रतिक्रिया दिनुहोस्
.jpg)
