Health and Lifestyle

गृहपृष्ठ

सामूहिक बलात्कार मुद्दाका फरार दुई अभियुक्त १२ वर्षपछि पक्राउ इलाम। इलाममा जबर्जस्ती करणी गरी फरार रहेका दुई अभियुक्त १२ वर्षपछि पक्राउ परेका छन्। जिल्ला प्रहरी कार्यालय इलामले चुलाचुली-३ का ३० वर्षीय मिलन भनिने अनिश राई र ३१ वर्षीय जितकुमार भनिने निश्चल राईलाई पक्राउ गरेको हो। फैसला कार्यान्वयन प्रक्रियालाई तीव्रता दिने अभियानअन्तर्गत अदालतबाट दोषी प्रमाणित भई फरार रहेका दुईजनालाई प्रहरीले पक्राउ गरेको हो।  २०६४ मा झापा साधुहोली जङ्गलमा सामूहिकरूपमा जबर्जस्ती करणी गरी फरार रहेका इलामका उनीहरूलाई विशेष खोजी अभियान नै सञ्चालन गरेर पक्राउ गरिएको जिल्ला प्रहरी कार्यालय इलामका प्रहरी नायव उपरीक्षक लालध्वज सुवेदीले जानकारी दिए। उनका अनुसार दुवैलाई २०६७ फागुन ११ गते जिल्ला अदालतबाट ११ वर्ष एक महिना १५ दिन कैद र जनही २१ हजार रूपैयाँ जरिवाना तोकिएको थियो। दुवैलाई जिल्ला अदालतमा पेश गरेकोमा कैद भुक्तानका लागि सोमबार कारागार कार्यालय इलाममा पठाइएको प्रहरीले जनाएको छ। उक्त मुद्दामा एकजना हाल जिल्ला कारागार इलाममा कैद भुक्तान गरिरहेका छन्। एकजना अझै फरार रहेको र उनको खोजी भइरहेको प्रहरीले जनाएको छ। अन्य तीनसमेत पक्राउ त्यसैगरी ठगी मुद्दा, कर्तव्य ज्यान मुद्दा र हातहतियार खरखजना मुद्दाका फरारहरूलाई समेत प्रहरीले पक्राउ गरेको छ। जिल्ला प्रहरी कार्यालय इलाम तथा मातहत प्रहरी कार्यालयबाट खोजतलासका क्रममा ठगी मुद्दाका इलाम सुर्योदय नगरपालिका–२ का ३२ वर्षीय सन्तोष बस्नेत, हातहतियार खरखजना मुद्दाका इलाम सुर्योदय नगरपालिका–५ का ४४ वर्षीय मोटे देवान भन्ने हर्कबहादुर लिम्बू र कर्तव्य ज्यान मुद्दाका माईजोगमाई गाउँपालिका–२ का विष्णुकुमार राई पक्राउ परेका हुन्। बस्नेतलाई दुई वर्ष कैद र २० हजार रूपैयाँ जरिवाना, लिम्बूलाई तीन महिना कैद र पाँच हजार जरिवाना तथा राईलाई पाँच महिना ६ दिन कैद र २० रूपैयाँ जरिवाना तोकिएको  प्रहरीकाे भनाइ छ। रासस

प्रतिक्रिया दिनुहोस्